धनगढी- नवनिर्वाचित सुदूरपश्चिम प्रदेशसभा सदस्य दमन भण्डारीले पद तथा गोपनीयताको शपथ लिएका छन्। उनलाई सभामुख भीमबहादुर भण्डारीले बिहिवार पद तथा गोपनीयताको शपथ ग्रहण गराएका हुन्। भण्डारी वैशाख १५ गते बझाङ(क)मा भएको उपनिर्वाचनमा विजयी भएका थिए ।
उपनिर्वाचनमा नेकपा एमालेबाट उम्मेदवार भएका भण्डारीले आफ्ना निकटतम प्रतिस्पर्धी नेपाली काँग्रेसका अभिषेकबहादुर सिंहलाई पराजित गर्दै विजयी भएका थिए । भण्डारीले ११ हजार ६१२ मत प्राप्त गरेका थिए भने सिंहले ११ हजार ३४६ मत प्राप्त गरेका थिए।
२०७९ को निर्वाचनमा सो क्षेत्रबाट निर्वाचित नेपाली काँग्रेसका प्रदेशसभा सदस्य पृथ्वीबहादुर सिंहको सडक दुर्घटनामा मृत्यु भएपछि उपनिर्वाचन भएको थियो। भण्डारीसहित एमालेबाट सुदूरपश्चिममा ११ जना प्रदेश सभा सदस्य भएका छन्।
