धनगढी । सुदूरपश्चिम प्रदेशका पूर्वमन्त्री रमेशसिंह धामीले प्रदेश सरकारको बजेट नीति,कार्यक्रम,प्राथमिकता र सिद्धान्तका आधारमा नआएको बताएका छन् ।
बुधबार बिहान बसेको प्रदेशसभाको बैठकमा आगामी आवका लागि प्रदेश सरकारले ल्याएको बजेटमाथिको छलफलमा सहभागी हुँदै उनले यस्तो बताएका हुन् ।
उनले प्रदेश सरकारले ल्याएको बजेटमा सबै सांसद भ्रमित भएको बताए । आफूहरुले सुझाव सल्लाह दिएको भएपनि कांग्रेस एमालेको अन्तरद्वन्द्वका कारण त्यो अनुसारको बजेट आउन नसकेको उनले बताए ।
उनले भने ‘बजेट ढिलो किन प्रस्तुत भयो सबैलाई थाहा छ । कांग्रेस एमाले अर्थात अर्थ र भौतिक मन्त्रालय कुरा मिलेन यो सबैलाई थाहा छ । आज हाम्रा गतिविधि कसले थाहा पाउँदैनन् ।’ असार १ गते दिउँसो ४ वजे बजेट प्रस्तुत गरिने भने पनि ७ बजेका लागि सारिएको थियो ।
नेकपा (माओवादी केन्द्र)का केन्द्रीय सदस्य समेत रहेका धामीले भने ‘सरकार नढाल्नुस्,बजेट फेल गर्नुस्,मन्त्रालयले परिवर्तन गर्नुस्,एक महिना पछि पैैसा फिर्ता माग्न कतिका घर घेर्छन,फेसबुक सामाजिक सञ्जालमा आउँछ । आफै कारबाही हुन्छ । आट गर्नुस् जनतालाई भ्रममा पार्ने छुट छैन् ।’
उनले सरकार जनताका समस्यामा गम्भीर हुन नसकेको बताउँदै जनतालाई विश्वासमा लिन नसकेको बताए । त्यस्तै,उनले संघीय लोकतान्त्रिक गतन्त्रात्कम व्यवस्थाको प्रमुख हिस्सेदार माओवादी केन्द्र भएको बताए । उनले भने ‘यो व्यवस्थाको प्रमुख हिस्सेदार माओवादी केन्द्र हो । हामी यहाँ वहिस्कार,अवज्ञा गर्न सक्छौँ, तर हामी जनता तिर फर्केका र्छौँ ।’
उनले भने ‘माओवादी केन्द्रले पनि जनतालाई विश्वासमा लिन नसक्ने हो भने जनता पैदा भएको वितृष्णा अझ त्यो झन बढेर जाने र यो व्यवस्था टिकाउन नसक्ने स्थिति पैदा हुन्छ भनेर हामी गम्भीरताका साथ लागेका छौँ ।’
