कैलाली । काम गर्ने ईच्छाशक्ति र योजना भए विदेशिनु पर्दैन भन्ने उदाहरणका पात्र बनेका छन् गोदावरी नगरपालिका–१० मालाखेती खमौराका ३ जना गाउँले दाजुभाइ । मालाखेती खमौराका ईन्द्रबहादुर सिंह मडैले आँपको सिजनमा घण्टेश्वर मन्दिर जग्गामा रहेको आँपको बगैंचालाई भाडामा लिएर काम गरिरहेका थिए ।
उनले बगैंचा भाडामा लिएर करिब ११ बर्ष काम गरे । एक सिजनको एक लाख ५० हजार रुपैयाँ दिन्थे । पछि आँधीहुरीका कारण बगैंचा नष्ट भयो । पछि उनले अर्को ठाउँमा भाडामा लिने सोच बनाए गाउँकै दुईजना भाइ मानबहादुर मडै र लोकबहादुर मडैलाई साथमा लिएर साझेदारीमा गोदावरी–५ गेटामा चेतराज भण्डारीको आँपको बगैंचा भाडामा लिए ।
उनीहरुले ५ लाख दिने गरी सो बगैचा भाडामा लिएको उनले बताए । इन्द्रबहादुरले भने ‘एक बर्ष जति भयो । बगैंचामा फलेका आँपको कारोबार ५ लाख सम्म भएको छ । अझै १० लाखभन्दा बढीको आँप छ । सिजनभर थप दस लाख जतिको कारोबार हुन्छ होला सबै खर्च कटाएर ८ लाख जति बचत हुन्छ ।’
उनले भने ‘हामी अर्गानिक आँप फलाउँछौँ । औषधी प्रयोग हुँदैन । आँप किन्नका लागि ग्राहकहरुको भीड लाग्ने गर्दछ । हामीसँग दशहेरी,माल्टा,चौसा,बम्बइ जातका आँप छन् ।’
दिनमा ३५ देखि ४५ हजारको कारोबार हुने गरेको उनले बताए । आँप किन्नका लागी महेन्द्रनगर,लम्की, धनगढीका विभिन्न स्थान,अत्तरिया क्षेत्रबाट ग्राहक आउने गरेको उनले बताए ।
उनले भने ‘केही आँप पाक्न बाँकी छ । भदौतिर पाक्न सुरु हुन्छ होला ।’ आँप लिन आउने ग्राहकहरु धेरै खुशी हुने गरेको उनले बताए । ‘ताजा आँप बारीबाटै ग्राहकहरुले लिन पाउँदा खुशी त हुने नै भए’ उनले भने ‘फुटकरमा ८० रुपैयाँ र होलसेलमा ६० रुपैयाँका दरले बिक्री गर्ने गरिएको छ ।’
उनले भने ‘बजारमा आफै लिएर बेच्ने गरेको छैन् । ग्राहक आफै आउँछन् । छानेर रुखबाटै किनेर लैजान्छन्् ।’
‘आँपको फूल नलाग्नु अगाडि किरा नलागुन भन्ने उदेश्यले औषधी छर्कनु पर्छ फूल लागिसकेपछि औषधीको प्रयोग गर्देनौ। स्पेसल रुपमा हाम्रो उत्पादन अर्गानिक हुन्छ ।’ उनले भने ।
अन्य काम नभएको र यसैबाट परिवारको लालनपालन,छोराछोरीको पढाइलेखाइ खर्च गर्ने गरेको उनीहरुको भनाइ छ । उनले भने ‘हामी अन्य स्थानमा पनि खोजी गर्दैछौ । यो त छँदै छ पायो भने अर्को ठाउँमा पनि भाडामा लिने सोच बनाएका छौँ ।’ मेहनत परिश्रम गर्न सके आफ्नै माटोमा राम्रै आम्दानी गर्न सकिने र कामको खोजीमा कँही जानु नपर्ने उनीहरुको भनाइ छ । योजना बनाएर काम गर्न सके आफ्नै नेपालमा काम गर्न सकिने उनीहरु बताउँछन् ।
