धनगढी । नागरिक उन्मुक्ति पार्टी (नाउपा )को अध्यक्ष लालवीर चौधरीलाई बनाउने प्रयास भएको छ । अध्यक्ष रञ्जिता श्रेष्ठ चौधरीलाई हटाएर लालवीर चौधरीलाई बनाउन लागिएको छ । रञ्जिता श्रेष्ठका श्रीमान् रेशम चौधरीकै योजनामा उक्त प्रयास भइरहेको छ ।
नाउपा नेताहरूको भनाइमा श्रीमती रञ्जितालाई हटाएर रेशमले बाबु लालवीरलाई अध्यक्ष बनाउने प्रयास गरेका हुन् ।
११ साउनमा अध्यक्ष श्रेष्ठले कार्यवाहक अध्यक्षमा शिव बास्तोलालाई जिम्मेवारी तोकेपछि विवाद उत्कर्षतिर लागेको थियो । कार्यवाहकको जिम्मा पार्टीको विधानविपरीत तोकिएको नाउपाका असन्तुष्टहरूको भनाइ छ ।
उनीहरूले बास्तोला पार्टीको कार्यवाहक हुने योग्यता नभएका नेता भएको आरोप लगाएका छन् । पार्टीको पदाधिकारीसमेत नभएको र संस्थापक केन्द्रीय सदस्य नभएकोले कार्यवाहकका लागि योग्य नभएको नेताहरूको आरोप छ ।
श्रेष्ठले कार्यवाहकको जिम्मेवारी बास्तोलालाई दिएपछि बहुमत केन्द्रीय सदस्यले राष्ट्रिय भेला बोलाएका छन् । बुधबारका लागि बोलाएको भेलाअघि श्रेष्ठलाई प्रष्टीकरण पनि सोधेका थिए ।
तर, श्रेष्ठ भने आफूले गल्ती नगरेकोले प्रष्टीकरण दिन आवश्यक नभएको तर्क गर्दै आएकी छिन् । शिलापत्रसँग श्रेष्ठले साथीहरूलाई जमघट हुन नरोकिएको तर राष्ट्रिय भेला नबोलाएको दाबी गरिन् ।
भेला बोलाउने अधिकार अन्य कसैलाई नभएको पनि उनले तर्क गरिन् ।
