धनगढी । सुदूरपश्चिम प्रदेशका भौतिक पूर्वाधार विकास मन्त्री सुरेन्द्रबहादुर पालले भूमिगत जलस्रोत तथा सिचाइ विकास डिभिजन कार्यालय र पथरैया मोहना सिचाइ व्यवस्थापन कार्यालय कैलालीको नवनिर्मित कार्यालय भवनको उद्घाटन गरेका छन् । शुक्रबार मन्त्री पालले एक कार्यक्रमका बीच भवनको उद्घाटन गरेका हुन् ।

भवनको उद्घाटन गर्दै मन्त्री पालले दुवै कार्यालय भवन जीर्ण अवस्थामा रहेकाेले प्रदेश सरकारले बजेट विनियोजन गरेको बताए । कार्यालय व्यवस्थित नभएसम्म प्रभावकारी रुपमा कार्य सम्पादन गर्न समेत असहज हुने उनले बताए । सहज र प्रभावकारी सेवा प्रवाहका लागि कार्यालय व्यवस्थापन प्रमुख कुरा भएको उनले बताए ।

दुबै कार्यालयका भवन सहरी विकास तथा भवन निर्माण कार्यालय धनगढीले गत आवको वार्षिक योजनाअनुसार ठेक्का प्रक्रिया मार्फत निर्माण गरेको थियो। सहरी विकास तथा भवन निर्माण कार्यालयका प्रमुख डम्बर धितालका अनुसार एउटा कार्यालयको एक करोड ९२ लाख ६० हजार बराबरको लागत स्टमेट रहेको बताए ।

पथरैया मोहना सिचाइ व्यवस्थापन कार्यालयको भवन निर्माणका लागि एक करोड १२ लाख र भूमिगत जलस्रोत तथा सिचाइ विकास डिभिजन कार्यालयको भवन पनि एक करोड १२ लाखमै सम्झौता गरिएकोमा निर्माण व्यवसायीले निर्धारित समयमै सम्पन्न गरेर हस्तान्तरण गरेको उनले बताए ।