धनगढी । कैलालीको गोदावरी नगरपालिकामा निर्माण भएको एकीकृत फोहोरमैला व्यवस्थापन केन्द्र सञ्चालनमा आएको छ। क्षेत्रीय सहरी विकासमार्फत निर्माण गरिएको केन्द्र शुक्रबारबाट सञ्चालनमा आएको हो।
नगरप्रमुख वीरेन्द्र भट्टले पूजासहित केन्द्र सञ्चालनमा ल्याएका छन्। उनले स्वच्छ र सुन्दर सहर निर्माणमा फोहोरमैला व्यवस्थापन केन्द्रले महत्वपूर्ण योगदान दिने विश्वास व्यक्त गरे। उनले भने ‘पालिकाको यो ठूलो र महत्वपूर्ण परियोजना सफलतापूर्वक सञ्चालनमा आएको छ। जसबाट नगरका सबै वडाहरूमा फोहोर व्यवस्थापनको कार्य प्रभावकारी रूपमा अघि बढ्नेछ ।’
केन्द्र सञ्चालन दुई वर्ष निजी कन्ट्रयाक्टर कम्पनी मार्फत सञ्चालन गरिने छ। त्यसपश्चात केन्द्रको जिम्मेवारी नगरपालिकाले ग्रहण गर्नेछ। नगरलाई जिम्मेवारी हस्तान्तरणपछि प्रभावकारी सञ्चालनका लागि आवश्यक दक्ष जनशक्ति तयार पार्न हाल ८ जना कर्मचारीहरूलाई उक्त केन्द्रमा राखिएको उनले बताए।
उक्त फोहोरमैला केन्द्रको गत जेठ २२ गते उपप्रधानमन्त्री एवं सहरी विकास मन्त्री प्रकाशमान सिंहले समुद्घाटन गरेका थिए।
