धनगढी । सुदूरपश्चिम प्रदेश सरकारले एक वर्षे प्रगति सार्वजनिक गरेको छ । मंगलबार मुख्यमन्त्री कमलबहादुर शाहले सरकारको एक वर्षे उपलब्धी सार्वजनिक गरेका हुन् ।

प्रगति सार्वजनिक गर्दै मुख्यमन्त्री शाहले प्रदेश सरकारले एक बर्षको अवधिमा १ सय ६ किलोमिटर सडक कालोपत्र गरेको बताए ।
उनले उक्त अवधिमा प्रदेश सरकारले १ सय ३ किलोमिटर ग्राभेल र १ सय ४६ किलोमिटर कच्ची सडक निर्माण सम्पन्न गरेको जानकारी दिए ।

त्यस्तै,सतही, भूमिगत र नयाँ प्रविधिमा आधारित सिंचाई प्रणालीबाट १ हजार ६२८ हेक्टर जमिनमा सिंचाई सुविधा थप गरिएको र मर्मत कार्यबाट १३ हजार ९४७ हेक्टर जमिनको सिंचाई सुविधालाई पुनःस्थापना गरिएको प्रदेश सरकारको कार्य प्रगतिमा उल्लेख छ ।

बाढीबाट बस्ती तथा खेतीयोग्य भूमि जोगाउन २७ किलोमिटर तटबन्ध निर्माण र २७ हेक्टर जग्गा नदी उकासबाट प्राप्त भएको जनाइएको छ ।
एक वर्षको अवधिमा प्रदेश सरकारले खानेपानीका ८ सय ४१ इन्टेक जडान, ५ सय १६ पोखरी निर्माण, २ हजार १३३ किलोमिटर पाइपलाईन जडान,११ हजार ९३९ निजी धारा जडान सम्पन्न भएको छ मुख्यमन्त्री शाहले जानकारी दिए

एक बर्षमा प्रदेशमा १४ हजार ७३२ सवारी साधन दर्ता भइ कूल २ लाख २१ हजार ४६४ पुगेको र पछिल्लो एक बर्षमा १८ हजार ५४५ नयाँ सवारी चालक अनुमति पत्र जारी तथा १९ हजार ३९९ सवारी चालक अनुमतिपत्र नवीकरण भएका प्रदेश सरकारको कार्य प्रगतिमा उल्लेख छ ।
त्यस्तै, निःशुल्क रक्त संचार सेवा अन्तर्गत १ हजार १८७ जना बिरामीलाई २ हजार १४८ पिन्ट रगत निःशुल्क उपलब्ध गराइएको, करिब १ लाख ४६ हजार ६१२ जना किशोरीहरुलाई पाठेघरको मुखको क्यान्सर विरुद्ध एचपिभी खोप लगाइएको जनाइएको छ ।

त्यस्तै,एआई प्रविधिद्वारा २२ हजार जनाको क्षयरोगका बिरामीहरुको चेकजाँच, ११ हजार भन्दा बढी महिलाई स्वास्थ्य शिविर मार्फत प्रजनन स्वास्थ्य सम्बन्धी सेवा प्रदान गरिएको,१४ हजार नागरिकमा नसर्ने रोगको स्क्रिनिङ कार्यक्रम सञ्चालन गरिएको र ४ हजार ३९७ जनामा सिकलसेल एनिमिया र थालेसिमिया रोग परीक्षण गरिएको छ जनाइएको छ ।

आर्थिक रुपले विपन्न नागरिकको औषधी उपचार सहायता कार्यक्रम अन्तर्गत ६४५ जनालाई उपचार सहायता प्रदान गरिएको प्रदेश सरकारले जनाएको छ ।