धनगढी । कैलालीमा आगामी निर्वाचनका लागि मतदाता नामावली दर्ता गनै आउनेको भीड लाग्ने गरेको छ । आगामी फागुन २१ गते हुने प्रतिनिधि सभाको निर्वाचनका लागि मतदाता नामावलीमा नाम दर्ता गराउने भीड लाग्न थालेको हो ।
मतदाता नामावलीमा नाम दर्ता गराउन दैनिक चार सयको हाराहारीमा आउने गरेको प्रदेश निर्वाचन कार्यालयका प्रमुख प्रेमराज भट्टले बताए । नयाँ नामावली दर्ता गराउनेमध्ये अधिकांश युवा रहेको उनले बताए ।
उनका अहनुसार गत असोज १० गतेदेखि मतदाता नामावली दर्ता सुरु गरिएकोमा मंगलबारसम्म ३ हजार ७ सय ७० जनाले नयाँ मतदाताका लागि नाम दर्ता गराएका छन् ।
जसमध्ये २ हजार ३ सय ३९ पुरुष र १ हजार ४ सय ३१ जना महिलाले मतदाता नामावलीमा नाम दर्ता गराएको उनले जानकारी दिए ।
१६ वर्ष उमेर पुगेकाले मतदाता नामावलीमा नाम दर्ता गराउन पाउँने र मताधिकारका लागि १८ वर्ष पूरा भएको हुनुपर्ने भएकाले हाल नाम दर्ता गराएका मध्ये ६० प्रतिशत नयाँ मतदाता थपिन सक्ने अनुमान रहेको बताए ।
प्रदेश निर्वाचन कार्यालय धनगढीका अनुसार आगामी कार्तिक ३० गतेसम्म मतदाता नामावलीमा नाम दर्ता गर्न सकिने छ । कैलालीमा पाँच लाख ३४ हजार ८६४ अद्यावधिक मतदाता रहेको कार्यालय प्रमुख भट्टले जानकारी दिए । जसमध्ये २ लाख ६१ हजार ५१८ पुरुष,२ लाख ७३ हजार ३३४ महिला र अन्य १२ जना मतदाता रहेको जनाइएको छ ।
सरकारले आगामी फागुन २१ गते प्रतिनिधिसभाको निर्वाचन गर्ने घोषणा गरेको छ ।
