धनगढी । नेकपा एमालेका स्थायी समिति सदस्य एवं गण्डकी प्रदेशका पूर्वमुख्यमन्त्री खगराज अधिकारीले पार्टीको आगामी महाधिवेशनमा अहिलेकै नेतृत्वले निरन्तरता पाउने बताएका छन् ।
प्रेस चौतारी नेपाल कैलालीले बिहीबार धनगढीमा आयोजना गरेको पत्रकार सम्मेलनमा बोल्दै उनले यस्तो बताएका हुन् ।
उनले भने ‘हाम्रो विधान महाधिवेशनले एउटा संरचना निर्माण गरेको छ । त्यसै अनुसार नेतृत्व निर्माण हुन्छ । मरो विचारमा राम्रै हुन्छ र महाधिवेशनमा बाहिर चर्चा भएजस्तो हुँदैन । अहिलेको नेतृत्वले नै निरन्तरता पाउँछ ।’
उनले भने ‘केही साथीहरुले १० औँ महाधिवेशनदेखि नै पार्टीको नीति निर्णय बाहिर ल्याउनुभन्दा पनि आफ्ना निजी विचार ल्याइरहनुभएको छ । ती अत्यन्तै सानो संख्यामा छन् । पार्टी एकताबद्ध भएर अगाडि बढ्छ ।’
त्यस्तै उनले अप्ठेरो पर्दा पार्टीको नीति,सिद्धान्त,चुनाव चिन्ह छोड्ने र अरुलाई गाली गर्ने पार्टी नबनाउने बताए । उनले एमाले कमजोर हुँदा देश,राष्ट्रियताको आन्दोलन,राष्ट्रिय स्वाधिनताको आन्दोलन,राष्ट्रिय स्वाभिमान कमजोर हुने बताउँदै एमाले कमजोर हुन नहुने बताए ।
उनले गत भदौ २३ र २४ गतेको जेनजी आन्दोलनमा घुसपैठका कारण ठूलो क्षति भएको र त्यो समयमा भएका अराजक गतिविधिको निश्पक्ष छानविन हुनपर्ने बताए ।
जेनजीले राखेका सुशासन,सामाजिक सञ्चाल फुकुवा जस्ता पवित्र भावनाले राखेका मागहरुप्रति आफ्नो उच्च सम्मान रहेको बताउँदै त्यो समयमा भएका अराजक गतिविधिप्रति घृणा रहेको बताए ।
