धनगढी । जिल्ला प्रशासन कार्यालय कैलालीले जेनजी आन्दोलनका घाइतेलाई वर्गीकरणका लागि आउन आह्वान गरेको छ ।
प्रशासन कार्यालयले सूचना जारी गर्दै २०८२ मंसिर ४ गतेसम्म जेनजी आन्दोलनका घाइतेलाई वर्गीकरणका लागि आउन आह्वान गरेको छ ।
‘स्वास्थ्य तथा जनसंख्या मन्त्रालयबाट ‘जेनजी प्रदर्शनका घाइतेहरुको वर्गीकरण सम्बन्धी कार्यविधि, २०८२’ स्वीकृत भइसकेको छ’ प्रशासकीय अधिकृत शिवराज जोशीद्वारा जारी सूचनामा भनिएको छ ‘सोही कार्यविधि अनुसार यस जिल्लामा प्रमुख जिल्ला अधिकारीको संयोजकत्वमा एक वर्गीकरण सहजीकरण समिति गठन भई घाइते व्यक्तिहरुको विवरण संकलन तथा वर्गीकरण कार्य प्रारम्भ गरेको छ ।’
साथै अस्पतालमा उपचाररत घाइतेहरुको हकमा वर्गीकरण सहजीकरण समितिबाट सम्वन्धित अस्पतालमै गई निरीक्षण गरी घाइतेको वर्गीकरण गरिने समेत सूचना उल्लेख छ ।
घाइतेहरुले वर्गीकरणका लागि,निवेदन,नेपाली नागरिकताको प्रमाणपत्र/राष्ट्रिय परिचय पत्रको छाँयाप्रति (सक्कल समेत), परिचय पत्र प्राप्त गरिसकेको हकमा परिचय पत्रको प्रतिलिपि पेश गर्नुपर्ने जिल्ला प्रशासन कार्यालयले जनाएको छ ।
त्यस्तै,सम्वन्धित स्थानीय तहको सिफारिस,घाईते भएको अङ्गको रङ्गिन फोटोहरु र प्रदर्शनका क्रममा घाईते भइ अस्पतालमा उपचार गराएको बिरामी टिकट/पूर्जी/डिस्चार्ज कागजात पेश गर्नुपर्ने जनाइएको छ ।
