धनगढी । नेपालबाट कामको खोजीमा भारत जाने नेपालीहरु दैनिक बढ्न थालेका छन् । सुदूरपश्चिमका विभिन्न जिल्लाबाट कामको खोजीमा कैलालीको त्रिनगर भन्सार नाकाबाट दिनहुँ सयौँको संख्यामा नेपालीहरु भारत जान थालेका हुन् ।
त्रिनगर भन्सार नाकाबाट मात्रै एक हप्तामा २ हजार ९० जना कामको खोजीमा भारत गएको प्रहरी प्रहरीको तथ्यांक छ । यही पुस ४ गते ३१५,५ गते ४२५, ६ गते ६२० जना कामको खोजीमा नेपालबाट भारत गएका छन् ।
त्यस्तै, पुस ७ गते १५०,८ गते २३५ र ९ गते ३४५ जना कामको खोजीमा भारत गएको प्रहरीको तथ्याङ्कमा उल्लेख छ । नेपालमा बढ्दो बेरोजगारीका कारण घरखर्च चलाउनका लागि भारत जानु परेको बाजुराका किसन खड्काले निशाना न्युजलाई जानकारी दिए ।
नेपालमा अवसर देखिएन प्रविणता प्रमाणपत्र तह उत्तीर्णपछि कामको खोजीमा भारत गएको उनले बताए । आर्थिक अवस्था कमजोरीका कारण माथिल्लो कक्षामा भर्ना हुन नसक्दा आफू कामको खोजीमा भारत जान थालेको उनको भनाइ छ ।
भारतको महाराष्ट्र मुम्बइको एक होटलमा रोजगारी गर्ने गरेको उनले बताए । घरमा ४ जना परिवार रहेको र सबैको पालनपोषण यही कामबाट धानीरहेको उनले बताए । उनले भने ‘नेपालमा केही पनि छैन,सरकार स्थिर छैन,यहाँ बसेर के गर्ने ? भविष्य नदेखेपछि रोजगारी गर्न बाध्य भएर भारत जानु परेको छ ।’
त्यस्तै कञ्चनपुरको कृष्णपुर नगरपालिका बस्ने दीलबहादुर आउजीको अवस्था पनि उस्तै छ । नेपालमा जिविका चलाउन काम नपाएपछि रोजगारकिा लागि भारत जानु परेको उनले बताए ।
भारतको राजस्थानस्थित एक सब्जीमण्डीमा चौकीदारीको काम पाएको उनले बताए । ‘खानलाउन मजाले पुग्छ । नेपालमा दुई छोरा र एक छोरीको पढाइलेखाइमा आफ्नो पारिश्रमिक पठाउने गरेको छु ।’
घरखर्च र छोरा/छोरीको पढाइलेखाइका लागि खर्च चलिरहेको उनको भनाइ छ । उनले भने ‘नेपालमा काम खोजी गरेको थिए । तर कुनै सीप नलागे पछि बाध्य भएर रोजगारीका लागि भारत जानु परेको छ ।’
‘श्रीमती पनि संगै छन् । हामी दुईटै उतै काम गर्दैछौँ’ उनले दुःखेसो गर्दै भने ‘नेपालमा केही छैन हामी जस्ता धेरै मानिस कामको खोजीमा भारत गइरहेका छन् ।’
