हिमाल जोशी
धनगढी । नेपाल प्रहरी राजमार्ग सुरक्षा तथा ट्राफिक व्यवस्थापन कार्यालय अत्तरिया र जिल्ला ट्राफिक प्रहरी कार्यालय कंचनपुरको संयुक्त आयोजनामा राजमार्गमा सूचना बोर्ड स्थापना गरिएको छ ।
सवारी दुर्घटना न्यूनिकरण तथा सुरक्षित यात्रालाई प्रवर्द्धन गर्ने उद्देश्यले कंचनपुरको कृष्णपुर नगरपालिका–२, बाणीमा ‘ब्ल्याक स्पट म्यापिङ’ तथा सूचनामूलक बोर्ड स्थापना गरिएको हो ।
सुदूरपश्चिम प्रदेश प्रहरी प्रमुख ओमबहादुर रानाले औपचारिक रूपमा सुचना बोर्डको उद्घाटन गर्दै बढ्दै गएको सवारी दुर्घटनलाई नियन्त्रणमा ल्याउन दुर्घटना बढी हुने स्थानहरूको पहिचान (ब्ल्याक स्पट) गरी चालक, सह–चालक तथा यात्रुलाई ट्राफिक नियम, सडकको अवस्था र जोखिमयुक्त क्षेत्रबारे जानकारी गराउने उदेश्यले बोर्ड राखिएको बताए ।
दुर्घटना सम्भावना उच्च रहेका स्थानहरूमा चेतनामूलक तथा सूचनामूलक बोर्डहरू राखिने, सडक प्रयोगकर्तालाई सचेत गराईनुका साथै ट्राफिक नियमको प्रभावकारी पालना गराउने मुख्य उदेश्य रहेको समेत उनले बताए ।
नेपाल प्रहरी राजमार्ग सुरक्षा तथा ट्राफिक व्यवस्थापन कार्यालयको वार्षिक कार्ययोजना अनुसार यो अभियान सुदूरपश्चिम प्रदेश स्थानीय तह, सरोकारवाला निकाय र नागरिकको सहकार्यमा कार्यक्रमलाई अझ प्रभावकारी बनाइने प्रदेश प्रहरी प्रमुख रानाले बताए । कार्यक्रममा वडा अध्यक्ष अर्जुन साउदले स्थानिय तहले यश कार्यमा सहकार्य गर्ने बताउँदै ईलाका प्रहरी र अस्थाई प्रहरी चौकीको स्थरउन्नती गरिनु पर्ने माग गरे ।
सुरक्षित सडक, अनुशासित ट्राफिक र जिम्मेवार यात्राको सन्देश बोकेको यस अभियानले सुदूरपश्चिममा ट्राफिक व्यवस्थापनलाई थप सुदृढ
बनाउने विश्वास गरिएको छ।
