काठमाडौँ । मकवानपुरको भीमफेदीस्थित जुरिखेतमा आज बिहान भएको स्कार्पियो दुर्घटनामा परेर घाइते भएकी एक महिलाको मृत्यु भएको छ।
घाइते लक्ष्मी बडूको उपचारका क्रममा काठमाडौँको छाउनीस्थित सैनिक अस्पतालमा मृत्यु भएको प्रहरीले जनाएको छ। उनी उच्च अदालत जनकपुरको अस्थायी इजलास वीरगञ्जका रजिस्ट्रार तारादत्त बडूकी पत्नी हुन्। दुर्घटनामा परेर रजिस्ट्रार बडू पनि घाइते भएका छन्।
काठमाडौँबाट हेटौँडातर्फ जाँदै गरेको प्रदेश–३–००२ झ ५१८३ नम्बरको स्कार्पियो जिप दुर्घटनामा परेको थियो। दुर्घटनामा परेर घाइते भएका उच्च अदालत जनकपुरको अस्थायी इजलास वीरगञ्जका न्यायाधीश गोकर्ण डाँगीसहित चार जनालाई हेलिकप्टरबाट तत्कालै काठमाडौँ ल्याइएको थियो।
सैनिक अस्पतालमा रजिस्ट्रार बडूकी ३१ वर्षीया छोरी रिता बडू र २५ वर्षीय छोरा रितेन्द्रको पनि उपचार भइरहेको छ। बडूको परिवार बैतडीको दशरथचन्द नगरपालिका–७ सुर्कालका स्थानीय हुन्।
