धनगढी । सुदूरपश्चिम प्रदेशमा ग्यासको आपूर्ति नियमित र सहज बनाउने विषयमा मुख्यमन्त्री खगराज भट्टले सरोकारवालासँग छलफल गरेका छन ।
प्रदेशमा पछिल्लो समय ग्यास अभाव देखिएको गुनासो बढेपछि मुख्यमन्त्री भट्टले नेपाल आयल निगम,ग्यास सप्लायर, डिलर, उद्योग वाणिज्य संघ तथा होटल व्यवसायी,उपभोगता हित संरक्षण , घरेलु तथा साना उद्योग कार्यालय,कैलालीका प्रमुख जिल्ला अधिकारी , जिल्ला प्रहरी कार्यालय कैलालीका प्रमुखलगायतका सरोकारवालासँग ग्यासको आपूर्ति र वितरण अवस्थाबारे जानकारी लिनुभएको हो।
मुख्यमन्त्री भट्टले उपभोक्तालाई ग्यासका लागि लामो समय लाइन बस्नुपर्ने अवस्था आउन नदिन नियमित र सहज आपूर्ति सुनिश्चित गर्न सम्बन्धित निकायलाई आग्रह गरे । उनले आपूर्ति व्यवस्थापनमा देखिएका समस्या तत्काल समाधान गर्नुपर्नेमा जोड दिए ।
निगमका प्रतिनिधिहरूले सुदूरपश्चिमका लागि नियमित रूपमा ग्यासको कोटा उपलब्ध भइरहेको तर, भारतमा रहेका करिब १५ वटा ग्यास बोकेका गाडी र कावड यात्राका कारण ढुवानीमा केही समस्या हुँदा बजारमा सिलिन्डर अभाव देखिएको बताएका छन्।
नेपाल आयल निगमका तर्फबाट ग्यास आपूर्तिमा कुनै ठूलो समस्या नरहेको र बजारमा पर्याप्त ग्यास रहेको बताइ पनि अभाव किन भयो ? भनेर मुख्यमन्त्री भट्टले जिज्ञासा राखेका थिए ।
उनले भने “जे जस्ता कारण भएपनि अभाव हुनु भएन, जनताको घरमा चुल्हो बल्न छोड्नु भएन ।” उनले समस्या तत्काल पहिचान गरि उपभोक्तालाई आश्वस्त बनाउन समेत निर्देशन दिए ।
छलफलमा ग्यासको कोटा प्रणालीलाई व्यवस्थित बनाउनुका साथै दीर्घकालीन रूपमा वैकल्पिक ऊर्जाको प्रयोगलाई प्राथमिकता दिनुपर्ने विषयमा समेत छलफल भएको थियो ।
