धनगढी । कैलालीमा भन्सार छली गरी ल्याएको ८१ ग्राम ८८० मिलिग्राम सुनसहित एक जना पक्राउ परेका छन ।
पक्राउ पर्नेमा बाँकेको नेपालगञ्ज उपमहानगरपालिका–९ बस्ने ३६ वर्षीय दिपक गौर रहेका प्रहरीले जनाएको छ ।
जिल्ला प्रहरी कार्यालय कैलालीबाट खटिएको प्रहरी टोलीले गौरले अवैध सुनजस्तो देखिने पदार्थ कारोबारका लागि साथमा बोकेर हिँडिरहेको भन्ने सूचनाका आधारमा खोजतलास गर्ने क्रममा धनगढी उपमहानगरपालिका-१ बाट उनलाई फेला पारी पक्राउ गरेको जनाइएको छ ।
खानतलासी गर्दा उनको खल्तीबाट ८१ ग्राम ८८० मिलिग्राम तौल भएको सुनजस्तो देखिने पदार्थ बरामद भएको जिल्ला प्रहरी कार्यालय कैलालीले जनाएको छ ।
बरामद सुनको मूल्य २१ लाख ६२ हजार १२३ रुपैयाँ बराबर रहेको जनाइएको छ।
गौरको साथबाट ‘निलो सुन चाँदी गहना पसल’को नाममा रहेको बिलसमेत फेला परेको र उक्त बिलमा छाप नरहेको र बरामद पदार्थको स्रोतसमेत खुलाउन नसकेपछि भन्सार छली गरी ल्याएको उक्त सुन बरामद गरिएको प्रहरीले जनाएको छ।
बरामद सुनसहित गौरलाई आवश्यक कारबाहीका लागि कैलाली भन्सार कार्यालय त्रिनगरमा बुझाइएको जनाइएको छ।
