धनगढी । कैलालीको बर्दगोरिया गाउँपालिका-३ स्थित लालिगुराँस सामुदायिक जङ्गलमा सिकार खेल्ने क्रममा भरुवा बन्दुकको गोली लागेर ४३ वर्षीय पदमबहादुर विश्वकर्माको मृत्यु भएको घटनामा प्रहरीले दुई जनालाई पक्राउ गरेको छ ।
मंगलबार दिउँसो सिकार खेल्ने क्रममा कृष्णबहादुर बुढा क्षेत्रीले जङ्गली बँदेललाई गोली हान्ने क्रममा विश्वकर्माको दाहिने छातीमा गोली लागेको प्रहरीले जनाएको छ।
घाइते विश्वकर्मालाई उपचारका लागि लैजाने क्रममा बाटोमै मृत्यु भएको जनाइएको छ ।
घटनापछि शवलाई जङ्गलमा लगेर राखी भागेको आरोपमा मृतकका भाइ गणेश विश्वकर्माले दिएको जाहेरीका आधारमा कृष्णबहादुर बुढा क्षेत्री र राकेश डगौरा थारुलाई प्रहरीले पक्राउ गरेको छ ।
प्रारम्भीक अनुसन्धानका क्रममा राकेशले घटनामा प्रयोग भएको भरुवा बन्दुक जडैठाँडास्थित काँडा नदीको बगरमा माटोमुनि लुकाएको खुलेपछि दुई थान भरुवा बन्दुकसमेत बरामद गरेको प्रहरीले जनाएको छ ।
घटनाबारे थप अनुसन्धान भइरहेको प्रहरीले जनाएको छ ।
