धनगढी। कृषि सामग्री कम्पनी लिमिटेड, प्रादेशिक कार्यालय धनगढीले कैलाली जिल्लाका स्थानीय तहका लागि रासायनिक मलको कोटा निर्धारण गरेको छ। प्रदेशस्तरीय मल वितरण व्यवस्थापन समितिको बैठकको निर्णयअनुसार जिल्लामा वितरण हुने युरिया र डीएपी मलको कोटा निर्धारण गरिएको हो।
कम्पनीको प्रादेशिक कार्यालय धनगढीले कैलालीका स्थानीय तहमा रहेका मल वितरण व्यवस्थापन समितिलाई पत्राचार गर्दै निर्धारण गरिएको कोटाभित्र रहेर मल विक्रेताहरूलाई मल उपलब्ध गराउने परिमाण तय गर्न अनुरोध गरेको छ।
कार्यालयले अनुदानको मल वितरण व्यवस्थापन कार्यविधि, २०८२ अनुसार तोकिएको समयभित्र विक्रेतागत कोटा निर्धारण गरी सिफारिस पठाउन आग्रह गरेको छ। साथै, उक्त कार्यविधिअनुसार मल बिक्री–वितरण भए वा नभएको विषयमा अनुगमन तथा निरीक्षण गर्नसमेत स्थानीय तहलाई अनुरोध गरिएको छ।
निर्धारित विवरणअनुसार धनगढी उपमहानगरपालिकाका लागि १०३.५५९ मेट्रिक टन युरिया र ९३.१३८ मेट्रिक टन डीएपी मलको कोटा तोकिएको छ। गोदावरी नगरपालिकाका लागि ९०.६१४ मेट्रिक टन युरिया र ८१.४९६ मेट्रिक टन डीएपी मल निर्धारण गरिएको छ।
त्यस्तै, गौरिगंगा नगरपालिका, घोडाघोडी नगरपालिका, कैलारी गाउँपालिका, भजनी नगरपालिका, लम्कीचुहा नगरपालिका र टीकापुर नगरपालिकाका लागि प्रत्येकमा १२९.४४९ मेट्रिक टन युरिया तथा ११६.४२३ मेट्रिक टन डीएपी मलको कोटा निर्धारण गरिएको छ।
बर्दगोरिया गाउँपालिकाका लागि ६४.७२४ मेट्रिक टन युरिया र ५८.२११ मेट्रिक टन डीएपी मल तोकिएको छ। जोशीपुर र जानकी गाउँपालिकाका लागि भने प्रत्येकमा १०३.५५९ मेट्रिक टन युरिया र ९३.१३८ मेट्रिक टन डीएपी मलको कोटा निर्धारण गरिएको पत्रमा उल्लेख छ।
कृषि सामग्री कम्पनीले स्थानीय तहलाई आफ्नो क्षेत्रमा मल वितरणको व्यवस्था प्रभावकारी बनाउन, विक्रेतालाई तोकिएको परिमाणभन्दा बढी मल उपलब्ध नगराउन र अनुदानको मल लक्षित किसानसम्म पुगे–नपुगेको अनुगमन गर्न आग्रह गरेको छ।
यस व्यवस्थाले मल वितरणलाई व्यवस्थित, पारदर्शी र कार्यविधिअनुरूप बनाउन सहयोग पुग्ने अपेक्षा गरिएको छ।
