धनगढी- कैलालीको निर्वाचन क्षेत्र नं. ५ मा सत्ता गठबन्धन र विपक्षी एमालेसहितका दलका आधिकारिक उम्मेदवारलाई बागी उठेका स्वतन्त्र उम्मेदवार चुनौतीको रुपमा खडा भएका छन् ।

अघिल्लो पटक प्रधानमन्त्रीपत्नी आरजु राणा देउवालाई पराजित गरेर चर्चामा आएका नेकपा एमालेका उम्मेदवार नारदमुनि रानालाई यसपटक पनि कैलाली ५ मा जित निकाल्न असहज छ । रानाविरुद्ध आउने तयारीमा रहेकी आरजुले मैदान छाडेपछि सहज मानेका रानाका लागि स्वतन्त्र उम्मदवार पुस्करनाथ ओझा उठेपनि असज बनेको हो ।

यहाँ प्रतिनिधिसभा सदस्यका लागि गठबन्धनको तर्फबाट ०७४ को प्रदेशसभामा विजयी भएका डिल्लीराज पन्त र एमालेका रानाबीच मात्रै प्रतिस्पर्धा छैनन् । कांग्रेसबाट कारबाहीमा परेका ओझा अहिले यहाँ स्वतन्त्र उम्मेदवारको रुपमा आएका छन् । पूर्वराज्यमन्त्रीसमेत रहेका ओझा २०७० सालमा प्रधानमन्त्री शेरबहादुर देउवाले तत्कालीन कैलाली ६ छोडेपछि भएको उपनिर्वाचनमा पनि विजयी भएका थिए । यहाँ यी तीन उम्मेदवारबीच कडा प्रधिस्पर्धा हुने आँकलन गरिएको छ ।

त्यस्तै प्रदेश सभातर्फ पनि दलबाट राजीनामा दिएर स्वतन्त्र उम्मेदवार खडा भएका छन् । प्रदेशसभा ९ख०बाट स्वतन्त्र उम्मेदवारी दिएका कांग्रेसका युवा नेता क्षितिज भण्डारी सत्ता गठबन्धन र विपक्षी दलका उम्मेदवारका लागि भारी देखिएका छन् । यस क्षेत्रमा नेपाली कांग्रेसका प्रकाश देउवा, नेकपा एमालेबाट दुर्गा जोशी, नागरिक उन्मुक्ति पार्टीबाट गोठु चौधरी, राष्ट्रिय प्रजातन्त्र पार्टीबाट शिवराज भण्डारी, नेपाली कांग्रेस ९बीपी०बाट दीपकराज खैर, नेपाल मजदूर किसान पार्टीबाट रामबहादुर दर्लामी मगर, संघीय लोकतान्त्रिक मञ्चबाट कार्तिक लुहार र स्वतन्त्रमा क्षीतिज भण्डारीले प्रतिस्पर्धा गरिरहेका छन् ।

प्रदेशसभा ९क०मा पनि स्वतन्त्र उम्मेदवारको रुपमा रमेश बस्नेत उठेका छन् । त्यस क्षेत्रमा गठबन्धनको तर्फबाट नेकपा माओबादी केन्द्रका नेता रमेश धामी, एमालेका तर्फबाट नेपालु चौधरी, नागरिक उन्मुक्ति पार्टी श्रीराम चौधरी, राप्रपाबाट पुस्करदत्त भट्ट र स्वतन्त्रबाट रमेश बस्नेत उम्मेदवार बनेका छन् । यहाँ पनि दलका आधिकारिक उम्मेदवारका लागि बस्नेत चुनौती बनेका छन् ।

प्रतिनिधिसभातर्फ यस क्षेत्रमा धनगढी उपमहानगरपालिकाका पूरै १९ वडा र कैलारी गाउँपालिका– ६ र ९ गरी २ वडा समेटिएको छ । स्थानीय निर्वाचनमा वडाध्यक्षहरूले पाएका मतलाई आधार मान्ने हो भने नेपाली कांग्रेस, नेकपा माओवादी केन्द्र र नेकपा एकीकृत समाजवादीले ३२ हजार ६१९ मत ल्याएको थियो । नेकपा एमाले एक्लैले यस क्षेत्रमा १७ हजार ४२० मत ल्याएको छ ।

अघिल्लो पटकको निर्वाचनमा राना २७ हजार २०२ मतसहित विजयी हुँदा राणाले २२ हजार ३२२ मत ल्याएकी थिइन् । उक्त निर्वाचनमा अन्तर्घात गरेको भन्दै पुष्करनाथलाई कांग्रेसले कारबाही गरेको थियो । धनगढी बनाउन आफूले उम्मेदवारी दिएको ओझाको दाबी छ । अहलिे जनमत पनि ओझातर्फ नै देखिएको छ ।

अघिल्लो पटक कांग्रेसबाट प्रदेशसभामा विजयी भएका पन्त आफूले अझै काम गर्ने गरी प्रतिनिधिसभाको उम्मेदवार भएको दाबी गरेका छन् । कांग्रेसमा आफूले गरिरहेको काम पनि जित्ने आधार भएको उनको जिकिर छ । गठबन्धनको मत र विगतमा प्रदेशसभा सदस्य हुँदा गरेको काम नै जित्ने आधार भएको पन्तको भनाइ हो ।

अहिले प्रतिनिधिसभातर्फको गठबन्धनको उम्मेदवार बनेका पन्त र स्वतन्त्र उम्मेदवार बनेका ओझाबीचको प्रतिस्पर्धालेसमेत एमाले उम्मेदवार रानालाई सहज हुने देखिएको छ । वैशाख ३० गतेको स्थानीय तहको निर्वाचनमा पनि उपप्रमुखमा गठबन्धनको उम्मेदवार शान्ति अधिकारी र स्वतन्त्र उम्मेदवारी दिएका प्रभाकर भण्डारीका कारण एमाले उम्मेदवार नन्दकला राना विजयी भएको विश्लेषण गरिन्छ ।