बैतडी – शहीद दिवसको पूर्वसन्ध्यामा बैतडीको दशरथचन्द नगरपालिकामा आजदेखि नगरस्तरीय महिला टी-२० क्रिकेट प्रतियोगिता शुरु भएको छ। दशरथचन्द नगरपालिकाको वार्षिक कार्यक्रमअनुसार नगर खेलकुद विकास समितिको आयोजनामा प्रतियोगिता शुरु भएको हो।
देहिमाण्डौँस्थित निङ्गलाशैनी खेलमैदानमा शुरु भएको प्रतियोगिताको एक कार्यक्रमबीच उद्घाटन गरिएको प्रतियोगिताका संयोजक वीरसिंह बोहराले जानकारी दिए।
उद्घाटन समारोह दशरथचन्द नगरपालिकाका उपप्रमुख कौशिला चन्द, बैतडी जिल्ला क्रिकेट संघका अध्यक्ष विनोदबहादुर चन्दलगायत उपस्थित थिए।
उद्घाटन समारोहमा बोल्दै उपप्रमुख चन्दले नगरपालिकाले खेलकुद क्षेत्रलाई प्राथमिकतामा राखिएको र महिलाहरूको क्रिकेट खेलतर्फ रुचि बढाएर दक्ष खेलाडी उत्पादन गर्ने हेतुले प्रतियोगिताको आयोजना गरिएको बताए।
नगरका ७ टोली सहभागी प्रतियोगिताको प्रथम पुरस्कार नगद २५ हजार, ट्रफी, मेडल र प्रमाणपत्र, द्वितीय पुरस्कार नगद १५ हजार, ट्रफी‚ मेडल र प्रमाणपत्र रहेको दशरथचन्द नगर खेलकुद विकास समिति अध्यक्ष भूपेन्द्र चन्दले जानकारी दिए।
यस्तै प्रतियोगितामा वुमेन अफ द सिरिजलाई ३ हजार, बेष्ट बलर र बेष्ट ब्याट्स वुमनलाई १५/१५ सय, अनुशासित टिमलाई ३ हजार र वुमन अफ म्याचलाई ट्रफी प्रमाणपत्र दिइने जनाइएको छ।
