गुलरिया – १४ औँ राष्ट्रपति रनिङ सिल्ड जिल्ला स्तरीय छनोट प्रतियोगिता कृष्णपुर नगरपालिकाले आयोजना गर्ने भएको छ । बुधबार जिल्लाको बेलौरीमा जारी १३औँ राष्ट्रपति रनिङ सिल्ड जिल्ला स्तरीय छनोटको समापन समारोहमा जिल्ला खेलकुद समिति कञ्चनपुरका अध्यक्ष कुबेर बहादुर खड्काले कृष्णपुर नगरपालिकाका नगरप्रमुख हेमराज ओझालाई रनिङ सिल्डको झन्डा हस्तान्तरण गरेका हुन ।
रनिङ सिल्डको झन्डा ग्रहणपछि नगरप्रमुख ओझाले आफूहरू १४ औँ राष्ट्रपति रनिङ सिल्ड जिल्ला स्तरीय छनोट प्रतियोगिता गर्न कृष्णपुर नगरपालिका सक्षम रहेको बताउँदै भोलिबाटै तयारी सुरु गर्ने बताए । कृष्णपुर नगरपालिकामा हाल पनि सरकारी विद्यालयमा राम्रो खेल मैदान रहेको र एक वर्षभित्रै १४औँ राष्ट्रपति रनिङ सिल्डकै लागि थप गुणस्तरीय खेल मैदान तयार गर्ने नगरप्रमुख ओझाले बताए ।
९ ओटा स्थानीय तह रहेको कञ्चनपुरमा बुधबार सम्पन्न १३ औँ राष्ट्रपति रनिङ सिल्ड जिल्ला स्तरीय छनोट प्रतियोगिता कृष्णपुरले तेस्रो स्थान हाँसिल गरेको छ । कृष्णपुरले ४ स्वर्ण ,४ रजत र ५ कांस्य गरी १३ पदक जित्दै तेस्रो बनेको हो । १९ स्वर्ण सहित भीमदत्त नगरपालिका पहिलो र ८ स्वर्णसहित शुक्लाफाँटा नगरपालिका दोस्रो बनेको हो । समापन समारोह नगरप्रमुख सहित उपप्रमुख,सम्पूर्ण वडाका वडाध्यक्ष लगायत कृष्णपुरका दर्जन बढी खेलप्रेमिको उपस्थित रहेको थियो ।
