धनगढी- कैलालीमा लोपोन्मुख सालक फेला परेको छ। जिल्लाको घोडाघोडी नगरपालिका–५ वन खेत शिबसमाज सामुदायिक बन छेउमा रहेको खानेपानी ट्यान्की नजिक बाट लोपोन्मुख सालक फेला परेको हो । आइतबार राति वन खेत गाउँ पस्दै गरेको अवस्थामा स्थानीयहरूले सालकलाई देखेका थिए।

वनकर्मी राजु मिनेलको नेतृत्वमा गएको टोलीले सालकको उद्धार गरेको सब डिभिजन वन कार्यालय सुखडका प्रमुख नितेशराज भट्टराईले बताए । उनका अनुसार उद्धार सालकलाई सब डिभिजन वन कार्यालय सुखडमा राखिएको छ।

सालक भेटिएपछि एकाबिहानै सब डिभिजन वन कार्यालय सुखडमा हेर्ने मान्छेको भीड लागेको थियो। सालक १५ के.जी तौल र ३.५ फिट लामो भाले सालक रहेको छ । दुर्लभ सालकलाई उद्धार गरेर उसकै प्राकृतिक वासस्थान छोड्ने तयारी भइरहेको बताइएको छ।

उक्त सालकलाई बर्दिया राष्ट्रिय निकुञ्जमा छोडिने डिभिजन बन कार्यालय पहलमानपुरका प्रमुख राम बिचारी ठाकुरले जानकारी दिए । सालक नेपालमा अति लोपोन्मुख वन्यजन्तुमा पर्ने भए पनि छालाका लागि चोरी तस्करी हुँदै आएको बताइन्छ । कैलालीमा यसको सङ्ख्या अति न्यून रहेको छ।

स्थानीय थारु भाषामा सालमच्छी र नेपालीमा तामे सालक भनेर चिनिने सालकको अङ्ग्रेजी नाम पेङ्गोलिङ्ग प्राय नेपाल, भारत, चीन लगायतका दक्षिण एसियाली राष्ट्रहरू तथा अफ्रिकाका उष्ण भू–भागमा पाइन्छ । शरीरमा ठुलठुला कत्लाले ढाकेको र खबटामुनि पहेँलो जगर जस्ता रौँ उम्रेका हुन्छन्।

पुच्छरको सहायताले रुखको हाँगामा झुन्डिने यो जनावर खतरा महसुस भएमा त्यसबाट जोगिन डल्लो पर्ने संरक्षण विद्को भनाइ छ । दुई हजार ५०० मिटर उचाइको सालको जङ्गलमा भेटिने सालकको दाँत नभए पनि ६० देखि ७० सेन्टिमिटरसम्म फैलने जिब्रोको सहायताले धमिरा र कमिला खान्छ ।