धनगढी । सुदूरपश्चिम प्रदेश सरकारको मन्त्रिपरिषद् बैठकले सामाजिक विकास मन्त्रालय र भौतिक पूर्वाधार विकास मन्त्रालयमा सचिव पदस्थापन गर्ने निर्णय गरेको छ।

आज बसेको मन्त्रिपरिषद्को बैठकले सामाजिक विकास मन्त्रालयको सचिवमा संगीता ओझा र भौतिक पूर्वाधार विकास मन्त्रालयको सचिवमा पदमराज देवकोटालाई पदस्थापन गर्ने निर्णय गरेको सरकारका प्रवक्ता एवं उद्योग,पर्यटन,वन तथा वातावरणमन्त्री प्रकाशबहादुर रावलले जानकारी दिए ।

मन्त्रालयहरूमा सचिवको पद रिक्त हुँदा बजेट निर्माणलगायत मन्त्रालयका नियमित काम प्रभावित हुँदै आएको अवस्थामा प्रदेश सरकारले सचिव पदस्थापन गरेको उनले बताए ।

सचिव पदपूर्तिसँगै बजेट निर्माण प्रक्रियामा देखिएको ढिलाइ हटाउँदै कामलाई थप गति दिने अपेक्षा गरिएको छ।

यसअघि सुदूरपश्चिम प्रदेश सरकारको प्रमुख सचिवमा सरुवा भएका उत्तमकुमार खत्री सोमबार प्रदेशमा उपस्थित भइसकेका छन ।

प्रमुख सचिवको उपस्थितिसँगै मन्त्रालयहरूमा सचिवको पदस्थापनसमेत भएपछि प्रदेश सरकारको बजेट निर्माण तथा कार्यसम्पादनले थप गति लिने अपेक्षा गरिएको छ।