धनगढी । नेपाली कांग्रेस धनगढी उपमहानगरपालिकाको सांगठनिक इतिहासमा वडा नम्बर १ ले एक ऐतिहासिक रेकर्ड कायम गरेको छ।
हालै सम्पन्न वडा अधिवेशनबाट धनगढी उपमहानगरपालिकाका १९ वडाहरूमध्ये वडा नम्बर १ को वडा सभापतिमा सरस्वती खड्का सभापतिमा निर्विरोध निर्वाचित भएकी छन ।
उपमहानगरपालिकाका अन्य १८ वडामा पुरुष नेतृत्व आउँदा वडा नं. १ ले भने महिलालाई कमाण्ड सुम्पिएर उदाहरणीय सन्देश दिएको छ।
सुदूरपश्चिमकै प्रमुख राजनीतिक र व्यापारिक केन्द्र मानिने धनगढी उपमहानगरपालिकाको मुख्य वडा (वडा नं. १) मा आन्तरिक एकता र आपसी समझदारी कायम गर्दै खड्कालाई सर्वसम्मत रूपमा चयन गरिएको हो।
नेतृ खड्कालाई निर्विरोध रूपमा नेतृत्व सुम्पिन नेपाली कांग्रेस धनगढी वडा नं. १ का निवर्तमान वडा सभापति प्रकाशबहादुर बिष्टले महत्वपूर्ण र नेतृत्वदायी सहयोग गरेको उनी बताउँछिन ।
पार्टी संगठनमा लामो समयदेखि सक्रिय, निष्ठावान र जुझारु नेतृका रूपमा चिनिने खड्का नगरभरिकै एकमात्र महिला वडा सभापति बनेपछि कांग्रेस कार्यकर्ता तथा आम महिला नेतृहरूमाझ नयाँ उत्साह थपिएको जनाइएको छ ।
नवनिर्वाचित सभापति खड्काले उपमहानगरकै एकमात्र महिला सभापति बन्न पाउनु आफ्नो लागि गौरवको विषय भएको बताउँदै निवर्तमान कार्यसमितिको भावना समेटेर वडामा कांग्रेसलाई अझ बलियो बनाउने प्रतिवद्धता व्यक्त गरिन । उनले आफूलाई विश्वास गर्ने निवर्तमान सभापति र सम्पूर्ण वडावासी कांग्रेस परिवारप्रति आभार प्रकट गरिन ।
