धनगढी । वाणिज्य आपूर्ति तथा उपभोक्ता संरक्षण कार्यालय धनगढीले दुई महिनामा १२३ वटा व्यावसायिक फर्मको अनुगमन गरेको छ ।
कार्यलयले चालु आवको साउन र भदौ महिनामा खाद्य तथा किराना,होटल तथा रेष्टुरेन्ट,ग्यास पसल,डेरी तथा मिठाइ पसलहरुमा अनुगमन गरेको हो ।
अनुगमन तथा निरीक्षणको क्रममा ११५ वटा फर्मलाई सामान्य कैफियतामा तत्काल सुधारका लागि निर्देशन दिइएको कार्यालयका निमित्त प्रमुख तारामान रावलले जानकारी दिए ।
त्यस्तै,कैफियत देखिएका ८ वटा फर्मलाई आवश्यक कागजात पेस तथा वयान माग गरिएको उनले जानकारी दिए । उनका अनुसार सो अनुगमन तथा निरीक्षणको क्रममा दुई हजार १० रुपैयाँ बराबरका खान अयोग्य वा म्याद सकिएका वस्तु नष्ट गर्न लगाइएको छ ।
त्यस्तै,कार्यालयले विभिन्न फर्म दर्ता,नवीकरण,खारेजी,संशोधनलगायतका शीर्षकमा रु दुई लाख ३२ हजार दुई सय ६० राजस्व संकलन गरेको रावलले जानकारी दिए ।
सो दुई महिनाको अवधिमा १३ वटा प्राइभेट फर्म दर्ता,३० वटा फर्म नवीकरण,३४ फर्म संशोधन,३ फर्म खारेजी,९ फर्मले प्रतिलिपी लिएका तथा १ फर्म स्थानान्तरण गरिएको उनले जानकारी दिए ।
त्यसैगरी,२ वटा साझेदार फर्म दर्ता,७ फर्म नवीकरण,१ फर्म खारेज गरिएको तथा ४ वटा कम्पनी फर्म दर्ता भएका कार्यालयले जनाएको छ ।
