धनगढी । सार्वजनिक बिदाको दिन अनुमति नलिई सरकारी गाडी प्रयोग गरेको भन्दै सुदूरपश्चिम प्रदेशका भौतिक पूर्वाधार विकास राज्यमन्त्री जानकी कुँवरले प्रयोग गर्ने सरकारी गाडीलाई ट्राफिक प्रहरीले जरिवाना गरेको छ । तर, सोही दिन आर्थिक मामिला राज्यमन्त्री जानकी ऐर बमले प्रयोग गर्ने सरकारी गाडीसमेत देखिएपछि त्यसबारे भने ट्राफिक प्रहरीले अनुसन्धान गरिरहेको जनाएको छ ।
न्युज सेभेन टेलिभिजनले प्रसारण गरेको भिडियो रिपोर्टमा सार्वजनिक बिदाको दिन सरकारी नम्बर प्लेटका दुई वटा गाडी देखिएका छन् । तीमध्ये भौतिक पूर्वाधार विकास राज्यमन्त्री कुँवरले प्रयोग गर्ने सुप प्र ०१००१ झ ०३९७ नम्बरको गाडीलाई जिल्ला ट्राफिक प्रहरी कार्यालय कैलालीले जरिवाना गरेको हो ।
जिल्ला ट्राफिक प्रहरी कार्यालय कैलालीका प्रमुख प्रहरी निरीक्षक रेशमप्रसाद आचार्यका अनुसार निषेधित समयमा सरकारी गाडी प्रयोग गरेको कसुरमा पहिलोपटकका लागि उक्त गाडीलाई रु. ५ सय जरिवाना गरिएको हो ।
तर, सोही भिडियोमा आर्थिक मामिला राज्यमन्त्री जानकी ऐर बमले प्रयोग गर्ने से १ झ ३१० नम्बरको सरकारी गाडीसमेत देखिएको छ । उक्त गाडी आर्थिक मामिला मन्त्रालयको रहेको र राज्यमन्त्री बमले प्रयोग गर्ने गरेको मन्त्रालयका प्रवक्ता सत्यराज जोशीले पुष्टि गरेका छन् ।
भिडियोमा देखिएको गाडीमा भने राज्यमन्त्री बम स्वयं सवार रहेको देखिँदैन । गाडीबाट ओर्लिएका एक युवाले आफू कोठा खोज्न आएको बताएको भिडियोमा देखिन्छ ।
ट्राफिक प्रहरी प्रमुख आचार्यले आर्थिक मामिला राज्यमन्त्री बमले प्रयोग गर्ने गाडी पनि भिडियोमा देखिएको स्वीकार गरे । तर, उक्त गाडी सोही दिन अर्को स्थानमा गएको जानकारी प्राप्त भएको उनले बताए ।
‘भिडियोमा दुई वटा गाडी देखिन्छन् । से १ त ३१० नम्बरको गाडी त्यही दिन अर्को स्थानमा गएको बुझिएको छ । त्यसबारे चालकसँग बुझ्न नपाउँदै गाडी निस्किएछ,’ आचार्यले भने, ‘हामीले बुझेर जरिवाना गर्नुपर्ने अवस्था रहेछ भने गर्छौँ ।’
सरकारी गाडी सार्वजनिक बिदाका दिन सञ्चालन गर्न सम्बन्धित निकायबाट अनुमति लिनुपर्ने व्यवस्था भए पनि एउटै घटनामा एउटा गाडीलाई तत्काल जरिवाना गरिएको र अर्को गाडीबारे थप बुझ्ने भनिएपछि ट्राफिक प्रहरीको कारबाही प्रक्रियामाथि प्रश्नसमेत उठेको छ ।
