धनगढी । सुदूरपश्चिम प्रदेशको कैलालीस्थित धनगढी उपमहानगरपालिका–१३ मा रहेको प्रादेशिक आयुर्वेदिक चिकित्सालयले प्राचीन आयुर्वेदिक उपचार विधि रक्तमोक्षण अर्थात् रगत शुद्धीकरण विधिबाट बिरामीको उपचार गर्दै आएको छ।
आयुर्वेदका पञ्चकर्म उपचार विधिमध्ये एक प्रमुख विधिका रूपमा रहेको रक्तमोक्षण प्रक्रियामा शरीरमा रहेको दूषित रगतलाई नियन्त्रित रूपमा बाहिर निकालेर उपचार गरिन्छ। चिकित्सालयका आयुर्वेद वैद्य कमल धामीका अनुसार विशेषगरी जलौका (औषधीय जुका) प्रयोग गरी गरिने रक्तमोक्षण अहिले बढी प्रचलनमा रहेको र तुलनात्मक रूपमा पीडारहित उपचार विधि हो।

यस विधिमा औषधीय जुकालाई छालाको प्रभावित भागमा राखेर दूषित रगत चुस्न लगाइन्छ। छालासम्बन्धी समस्या, डन्डीफोर, दाद, एक्जिमा, सोरायसिस तथा चिलाउनेजस्ता समस्यामा यस विधिबाट उपचार गर्न सकिने चिकित्सालयले जनाएको छ।
त्यस्तै, जोर्नी दुख्ने, सुन्निने, पुराना घाउमा हुने जलन तथा सूजन कम गर्न र रक्तसञ्चार सुधार गर्नसमेत रक्तमोक्षण विधि प्रयोग गरिँदै आएको छ। शरीरका विभिन्न भागमा रगत जमेको वा रक्तसञ्चारमा समस्या भएको अवस्थामा प्रभावित स्थानमा जलौका प्रयोग गरी उपचार गर्ने गरिएको चिकित्सालयका आयुर्वेद वैद्य अभ्यन्तकर्ता लक्ष्मण अवस्थीले बताए।
उनका अनुसार हालसम्म करिब ४२० जना बिरामीको रक्तमोक्षण विधिबाट उपचार भइसकेको छ। मासिक रूपमा औसत ३५ जना बिरामीले यस विधिबाट सेवा लिने गरेका छन्।
विशेषगरी कपाल झर्ने, शरीरका विभिन्न भाग सुन्निने तथा खुट्टाका नसा सुन्निएको जस्ता समस्यामा प्रभावित स्थानमा जलौका प्रयोग गरी उपचार गर्ने गरिएको अवस्थीले बताए।
प्राचीन आयुर्वेदिक उपचार पद्धतिलाई आधुनिक स्वास्थ्य सेवासँग जोड्दै चिकित्सालयले बिरामीलाई विभिन्न आयुर्वेदिक तथा पञ्चकर्म सेवा उपलब्ध गराउँदै आएको छ।