बझाङ- असोज १६ गते बझाङ सदरमुकाम चैनपुर केन्द्रबिन्दु बनाएर गएको ६।३ रेक्टर स्केलको भुकम्पपछि यस क्षेत्र वरिपरि केन्द्रबिन्दु बनाएर ५१३ वटा पराकम्पन गएको भुकम्प राष्ट्रिय भुकम्प मापन तथा अनुसन्धान केन्द्रले जनाएको छ ।

भुकम्पको जोखिममा रहेको बझाङ सदरमुकाम चैनपुरलगायत छिमेकी मष्टा, तल्कोट तथा छबिसपाथिभेरा गाउँपालिकामा केन्द्रबिन्दु बनाएर एक साताको अबधीमा मात्र ५१३ पटक भुकम्पका पराकम्पन गएकाले भुकम्पको जोखिम अझै कायम रहेको समेत बताइएको छ ।

राष्ट्रिय भुकम्प मापन तथा अनुसन्धान केन्द्रका भुकम्प बिज्ञसहितको टोलीले सदरमुकाम चैनपुरमा पत्रकारसँगको अन्तरक्रिया कार्यक्रममा भुकम्पको जोखिम अझै कायम रहेकाले सचेत रहन समेत आमनागरिकलाई आग्रह गरेको छ ।

भुकम्पबिद लोकमणी अधिकारीले झण्डै ५ सय बर्षयता पश्चिम नेपालमा भुकम्प नगएको र ठूलो शक्ति सञ्चित भएर बसेका भुकम्पसम्बन्धी बिभिन्न अध्ययनले देखाएकाले भुकम्प जतीखेर पनि आउनसक्ने भएकाले सबैले सुरक्षित रहनुपर्ने बताए ।

उनले असोज १६ गते यता मात्र बझाङमा केन्द्रबिन्दु बनाएर ४१३ वटा साना तथा ठूला पराकम्पन गएको बताउँदै भुकम्प कहिले, कती र कहाँ आउनसक्छ भन्नेबारे अहिलेसम्म अध्ययन समेत भइनसकेकाले भुकम्पको जोखिम कायम रहेको बताए । उनले ठूलो भुकम्पबाट आउन सक्ने शक्तिसँग लड्न सक्नेखालको भौतिक संरचना नरहेकाले भुकम्पमा सुरक्षित भएर बस्ने बिकल्प नरहेको बताए ।

भुकम्पसँग सम्बन्धित जानकारी तथा अध्यायनको अनुभव समेत सुनाउँदै उनले यो क्षेत्र भुकम्पको उच्च जोखिममा रहेकाले यसको दीर्घकालिन समाधानका लागि तीनै तहका सरकारले बेलैमा सोच्नुपर्ने समेत उनको सुझाव छ । सरकारले अब बनाउने संरचनाहरु भुकम्पमैत्री बनाउनमा जोड दिनुपर्ने, सरकारले भवन संहिता ऐन ल्याइसकेकाले त्यसको प्रभाबकारी कार्यान्वयनमा जोड दिनुपर्ने बताए ।

समान्यतया दुई–तीन महिनासम्म भुकम्पका पराकम्पन नरोकिने र ठूलो भुकम्पको समेत जोखिम रहेकाले यसको सबैभन्दा बढी सुरक्षित रहनुपर्ने बताए । दुई रेक्टरस्केल मात्र बढी हुँदा त्यसले एक हजार गुना बढी कम्पन हुनेहुँदा सबैले सुरक्षित रहने उपायका साथै अब बन्ने संरचना भवनसंहिता ऐनअनुसार तथा भुकम्पमैत्री बनाउन जोड दिन सबैलाई आग्रह समेत गरे ।

नेपाल बिज्ञान तथा प्रबिधी प्रज्ञा प्रतिष्ठानले बझाङ जिल्लाका बिभिन्न ४ वटा ठाउँमा भुकम्प मापनका लागि सिस्मोमिटर समेत जडान गरेको छ । जिल्लाको तल्कोट, दौलिचौर दुर्गाथली र चैनपुरमा सिस्मोमिटर जडानगरी भुकम्पबारेमा अध्ययन अनुसन्धान गर्न समेत सहज हुने बताइएको छ ।

बिहीबार बिहान १२ बजे २२ मिनेटसमेत सदरमुकाम चैनपुर आसपास केन्द्रबिन्दु बनाएर ५।२ म्याग्नीच्युडको भुकम्प गएको थियो । त्यसयता बिभिन्न पटक समेत साना पराकम्पन गएका थिए ।