महोत्तरी- प्रहरीले चलाएको गोली लागेर दुई जना घाइते भएका छन् । सर्लाहीको लालबन्दी नगरपालिका वडा नं. २ निवासी ३५ वर्षीय शक्ति कुमार पासमान र सोहि ठाउँ निवासी ३२ वर्षीय अजय पासमान गोली लागेर घाइते भएका हुन् । रौतहटको गरुडा नगरपालिका-४ पानी ट्यांकी नजिक लुकिछिपी बसेको अवस्थामा मंगलवार साँझ उनीहरुलाई प्रहरीले पक्राउ गरेको थियो ।

पक्राउ परेका दुवैजनालाई महोत्तरी ल्याउँदै गर्दा उनीहरु प्रहरीको नियन्त्रणबाट भाग्ने प्रयास गरेका थिए । सर्लाही प्रहरीले महोत्तरी प्रहरीलाई जिम्मा लगाउने क्रममा उनीहरु प्रहरीको नियन्त्रण बाहिर भाग्न खोज्दा गोली चलाउनु परेको जिल्ला प्रहरी कार्यालय महोत्तरीका प्रवक्ता डिएसपी दिलिप कुमार गिरीले जानकारी दिए।

प्रहरीले चलाएको १० राउण्ड मध्ये तीन राउण्ड गोली उनीहरुको दाहिने तिघ्रामा लागेको डिएसपी गिरीले बताए । घाइते भएका दुवैजना कुख्यात डाँका रहेको प्रहरीको भनाइ छ । उनीहरु विरुद्ध नेपालमा करिव एक दर्जन मुद्दा दर्ता भएको र भारतमा समेत अनेकौ मुद्दामा उनीहरु फरार रहेको प्रहरीले जनाएको छ ।

प्रहरीका अनुसार हालै महोत्तरीमा भएका विभिन्न लुटपाटका घटनामा उनीहरुको गिरोहको संलग्नता देखिएको छ । घाईतेहरुको प्रादेशिक अस्पताल जलेश्वर महोत्तरीमा उपचार भइरहेको छ । उनीहरुको अवस्था हाल सामान्य रहेको र तिघ्राबाट गोली निकालिएको चिकित्सकले बताएका छन् ।

यता जिल्ला प्रहरी कार्यालय महोत्तरीका एसपी प्रकाश मल्लले पक्राउ परेकाहरुसंगै लुटपाटमा संलग्न थप व्यक्तिहरुको समेत पहिचान भइसकेको र उनीहरुलाई नियन्त्रणमा लिने प्रयास भइरहेको बताए । पक्राउ परेकाको गिरोह विभिन्न ठूला लुटपाट र ज्यान मार्ने मुद्दामा संलग्न रहेको मल्लले बताए । उनीहरुको साथबाट प्रहरीले एकथान नलकटुवा पेस्तोल र सो मा लाग्ने ४ थान गोली समेत बरामद गरेको छ ।

प्रहरी नियन्त्रणबाट उनीहरु भाग्न खोज्दा समात्ने क्रममा दुईजना प्रहरी समेत सामान्य घाईते भएका छन् । सहायक हवल्दार संजय जयसवाल र प्रहरी जवान श्याम किशोर गिरी सामान्य घाइते भएको प्रवक्ता डिएसपी गिरीले बताए ।