धनगढी- धनगढीका वडाहरुमा ‘एकीकृत मोबाइल एप’ सुरु भएको छ । जिआइजेटको सहयोगमा धनगढीका उपमहानगरपालका वडा नम्बर ३, ११, १६ र १८ मा एकीकृत मोबाइल एप सुरु भएको हो ।
एपमा स्थानीय सरकारबाट सम्प्रेषित सम्पूर्ण सूचनाको जानकारी, घरबाटै नगरवासीले आफ्नो समस्या तथा गुनासो सिधै जनप्रतिनिधीसँग राख्ने, आफ्ना व्यक्तिगत कागजातहरु अपलोड गरी भण्डारण गर्नसक्ने जिआइजेटका जीवन श्रेष्ठले बताए ।
उनले पालिकाले कुनैपनि समयमा जो कोहीको लागि कागजातहरूको डिजिटल प्रतिलिपि उपलब्ध गराउन सकिने र पालिकाका सम्पूर्ण वेबसाइटको विवरणका बारेमा एकीकृत रूपमा जानकारी पाइने बताए ।
धनगढी उपमहानगरपालिकाका उपप्रमुख कन्दकलाकुमारी रानाले पालिकालाई प्रविधिमैत्री बनाउन पहल भइरहेको बताए । उपमहानगरबाट प्रवाह हुने सेवाका बारेमा सेवाग्राहीले घरबाटै जानकारी लिन सक्ने व्यवस्था गर्न लागेको हो ।
उपप्रमुख रानाले पालिकाबाट पाउने सेवासुविधाका बारेका जानकारी, पालिका र वडाबाट जारी गरिने सूचना र सेवा ग्राहीले सेवाका बारेमा गुनासो गर्नसक्ने गरी प्रविधिको विकास गर्न लागि परेको समेत बताए ।
