धनगढी- कैलालीको धनगढी उपमहानगरपालिका–७ मा रहेको देबहरिया वनस्पति उद्यानमा रहेको जाखोर तालमा स्थानीय पर्यटकहरु बढ्न थालेका छन् । सो क्षेत्र वातावरण मैत्री भएका कारण पनि स्थानीय पर्यटकको आकर्षण बढ्न थालेको छ ।

२०५६ सालमा मन्त्रीपरिषद्को निर्णयबाट वनस्पति विभागलाई हस्तान्तरण गरेको देबहरियामा दैनिक पाँच सय स्थानीय पर्यटक आउने गरेको देबहरिया वनस्पति उद्यानका प्रमुख गंगादत्त भट्टले बताए ।

१४९.५ हेक्टर क्षेत्रमा फैलिएको सो स्थानमा चार थरिका रैथाने कमल, १५० थरिका जलिय वनस्पतिका प्रजाति पाइने गरेको उनले बताए ।
उनले नेपालमा तीन प्रजातिका रैथाने जंगली धान मध्य यो क्षेत्रमा दुई प्रजातिका जंगली धान पाइने गरेको बताए । प्रयावरणीय हिसाबमा उपयुक्त ठाउँ भएका कारण चराहरूको वासस्थान पनि रहेको उनको भनाई छ ।

‘अध्ययन अनुसन्धान पर्यटन मनोरञ्जन गर्ने थलोको रूपमा विकास हुन थालेको छ’, भट्टले भने, ‘राज्यले म्युजियम र हरबेरियमको स्थापना गर्न सके विद्यार्थीका लागी राम्रो र सुदूरपश्चिमका सम्पुर्ण वनस्पतिको एकिन गर्न कठिन हुने थिएन् ।

यसबाट वनस्पति सम्पदाको संरक्षण र राज्यलाई निती निर्माणमा सहज र तीन तहका सरकार लाई फाईदा नै हुन् सक्ने उनको जिकीर छ ।
यो क्षेत्रमा आउने स्थानीय पर्यटकका लागी विद्यार्थी र बालबालिकाका लागी १० रुपैँया, जेष्ठ नागरिकका लागी ५ र अन्यका लागी २० रुपैँया टिकट निर्धारण गरेको छ ।