डडेल्धुरा- एमालेले सुरु गरेको मध्यपहाडी लोकमार्ग केन्द्रित यात्राको क्रममा शुक्रबार डडेल्धुरा पुगेका अध्यक्ष केपी शर्मा ओलीले प्रमुख सत्तारुढ दल कांग्रेस अहिले ‘प्रचण्डपथ’ को भरिया बनेर हिँडेको टिप्पणी गरेका छन् ।
कांग्रेस सभापति शेरबहादुर देउवाको गृहजिल्ला समेत रहेको डडेल्धुरामा आयोजित आमसभामा अध्यक्ष ओलीले कांग्रेको नीति र अहिलेको गन्तव्यबारे बोलेका हुन् । ‘अहिले मोटामोटी रुपमा यो सरकार प्रचण्डपथमा हिंड्न खोजेको छ ।
कांग्रेस प्रचण्डपथको भरिया बनेको छ’ अध्यक्ष ओलीले भने । डडेल्धुरा पुगेका ओलीले शुक्रबार बिहान कांग्रेस सभापति देउवालाई तपाईंको जिल्ला आएको छु भनेर टेलिफोन संवाद पनि गरेका थिए ।
अध्यक्ष ओलीले अहिले सरकारले हल्लिरहेको र कुनै पनि बेला ढल्न सक्ने दाबी गरे । ‘ सरकार हल्लिइरहेको छ । कर्याकमर्याक भइरहेको छ यो सरकार कुनै समय ढल्न सक्छ’ उनले भने,’यो गठबन्धनका छेस्काले टिकाएको सरकार हो ।’
उनले गठबन्धनका नेताहरु नेताहरु सत्ता स्वार्थ र कसरि मन्त्री हुने भन्नेमा लागिरहेको बताए । उनले मुलुक बर्बादीको दिशामा जान नदिनका लागि सबै सजग हुनुपर्ने बताए ।
