धनगढी- सुदूरपश्चिम प्रदेश सरकारका सामाजिक विकास मन्त्री झपट साउँदले धनगढी उपमहानगरपालिका वडा नं. १४ फूलबारीस्थित आसरा सुधार गृहको निरीक्षण गरेका छन् । सुदूरपश्चिम प्रदेश प्रहरी प्रमुख प्रहरी नायव महानिरीक्षक (डीआईजी) भरतबहादुर बोहरा र मन्त्री साउँदले संयुक्त रूपमा सुधार गृहको निरीक्षण गरेका हुन् ।
सुधार गृह निरीक्षणको क्रममा मन्त्री झपट साउँदले प्रहरीले प्रशंसनीय कार्य गरेको बताए । उनले अहिले समाजमा लागु औषध सेवनकर्ता हरूबाट समस्या श्रृजना भएको भन्दै सुविधा सम्पन्न सुधार गृहले टेवा पुराउने बताए । साउँदले भने–यो काम राज्यको पनि हो, यसमा प्रदेश सरकारले तत्काल कस्तो सहयोग गर्न सक्छ, गर्छ, ।
लागूपदार्थ सेवन बाट दुर्व्यसनमा फसेका व्यक्तिहरूको सुधारको लागि डिआईजी बोहराको सक्तियतामा उक्त सुधार गृहको निर्माण गरिएको हो । समाजमा लागूपदार्थ सेवन कर्ताहरुकै कारण विभिन्न आपराधिक गतिविधि हुने गरेकोले त्यसको निराकरण गर्न सुधार गृह सञ्चालनको तयारी अन्तिम चरणमा पुगेको प्रमुख प्रहरी नायव महानिरीक्षक (डीआईजी) बोहराले बताए ।
संघिय सरकारले वृद्धाश्रमको लागि भन्दै भवन निर्माण गरेर अलपत्र पारेपछि धनगढी उपमहानगरपालिकाको स्वामित्वमा रहेको निर्माणाधीन संरचनाको उपयोग गर्दै नेपाल प्रहरी श्रीमती संघ सुदूरपश्चिमको व्यवस्थापनमा सो सुधार गृह सञ्चालनमा ल्याउन लागिएको हो ।
प्रहरी श्रीमती संघ सुदूरपश्चिमले धनगढी उपमहानगर पालिका सँग २० वर्षको लागि भौतिक संरचना उपयोग गर्ने सम्झौता गरिसकेको छ ।
विभिन्न दुर्व्यसन बाट कुलतमा फसेका करिब दुई सय जना राख्न सकिने क्षमता उक्त सुधार गृह सँग रहेको र त्यही हिसाबले तयारी अघि बढाइएको डिआईजी बोहराले जानकारी दिए । पहिलो चरणमा ५० जना व्यक्तिहरूलाई राख्न लागिएको छ । उक्त सुधार गृहमा चौमासिक ६६ हजारका दरले शुल्क लाग्ने बताइएको छ ।
मासिक १४ हजार पाँच सयका दरले प्रतिव्यक्ति शुल्क लगिने छ । सो सुधार गृहमा विभिन्न खालका योगा, तालिम, मनोरञ्जन, आवश्यक औषधी, विषय विज्ञ मनोमरामर्श, विशेषज्ञ मानसिक डाक्टर लगायतको सुविधाहरू उपलब्ध गराइने छ । प्रमुख प्रहरी नायव महानिरीक्षक (डीआईजी) बोहराले सुदूरपश्चिमको कमाण्ड सम्हाले देखी नै यो प्रक्रियाका लागि संघिय सरकार र स्थानीय पालिका सँग समन्वय गरेका थिए ।
