काठमाडौं- नेपाल सुपर लिगमा धनगढी र पोखराबीचको खेल १/१ गोलको बराबरीमा सकिएको छ। अन्तिम समयमा गोल जोगाउन नसक्दा धनगढीले अंक बाँडेका हुन्।
खेलको ४२औं मिनेटमा धनगढीले गोल गर्दै अग्रता लिएको थियो। धनगढीका लागि मिलन राईले गोल गरेका थिए। त्यसबीच प्रतस्पर्धात्मक खेल भए पनि अन्तिम समयमा पोखराले गोल फर्काएको थियो। पोखराका लागि मोसेस ग्याबाले खेलको ९०औं मिनेटमा बराबरी गोल गरेका थिए।
यसअघि नै प्लेअफमा पुगिसकेको पोखरा बराबरीसँगै अंकतालिकाको शीर्ष स्थानमा उक्लिएको छ। उसले ८ खेलमा ४ जित, ३ बराबरी र एक हारसहित १५ अंक जोडेको छ। त्यस्तै ८ खेलमै धनगढीको ३ जित, ४ बराबरी र एक हारसँगै १३ अंकसहित दोस्रो स्थानमा छ। धनगढी पनि यसअघि नै प्लेअफमा पुगिसकेको छ।
