धनगढी- कैलालीको गोदावरी नगरपालिका वडा नम्बर ८ मजगाउँमा तीन दिन माघी महोत्सव हुने भएको छ । थारु कल्याणकारिणी सभा र गोदावरी नगर समिति मजगाउँको आयोजनामा माघ १२, १३ र १४ गते महोत्सव सञ्चालन हुने भएको हो ।

संस्कृति संरक्षण, स्थानीय पर्यटन र आधुनिक कृर्षि पर्यटनका लागि एकजुट हौ भन्ने मूल नाराका साथ तीन दिने महोत्सव सञ्चालन गरिन लागेको सभाका नगर अध्यक्ष जनकलाल चौधरीले बताए । लोप भइरहेको कृर्षिलाई संरक्षण गर्न महोत्सव गरिन लागेको उनले बताए ।

महोत्सवमा स्थानीय झाकीहरु प्रदर्शनका साथै थारु राष्ट्रिय कलाकारहरूको बेजोड प्रस्तुति रहने छ । महोत्सवमा थारु खानपानको व्यवस्था, थारु कला संस्कृतिको जगेर्ना सम्बन्धी विविध कार्यक्रम, थारु समाज सेवा तथा प्रतिभावन व्यक्तिहरूलाई सम्मान, ठुलो पिङ, चर्खा तथा अन्य रमाइलो मेला प्रदर्शन हुने आयोजकले जनाएको छ ।

महोत्सवमा थारु परिकार, कृर्षि उपज, स्थानीय उत्पादन लगायत १५ बढी स्टल रहने छ । महोत्सवमा २६ गाउँका थारु नाच प्रस्तुत हुने छ । पाँच लाख अनुमानित लगानीमा हुन लागेको महोत्सवमा हजारौँले अवलोकन गर्ने अनुमान गरिएको छ ।

महोत्सवलाई सफल बनाउन अध्यक्ष जनकलालको संयोजकत्वमा मूल आयोजक समिति गठन भएको छ । महोत्सवको प्रदेशका भूमि व्यवस्था, कृषि तथा सहकारी मन्त्री रामेश्वर चौधरीले समुद्घाटन गर्ने कार्यक्रम रहेको छ ।