धनगढी- धार्मिक तीर्थस्थलका रूपमा स्थापित हुन थालेको धनगढी उपमहानगरपालिका वडा नम्बर ४ को शिवपुरी धाममा श्रीमदभागवत सुरु भएको छ । शिवपुरी उत्तररामेश्वरम ज्योर्तिलिंग धाम व्यवस्थापन समितिको आयोजनामा बुुधबारदेखि ११ औँ श्रीमद भागवत महायज्ञ भएको हो । महायज्ञमा पुर्वप्रधानमन्त्री लोकेन्द्र बहादुर चन्द प्रमुख अतिथि रहेका छन ।

ब्रम्हनिष्ठ सन्त शिरामणी लोकानन्द स्वामी पनि श्रीमदभागवत महायज्ञमा उपस्थित भएका छन । फागुन २ गतेदेखि ८ गतेसम्म ७ दिनको श्रीमद भागवत प्रवचन, मत्स्यपुराण पारायण हुनेछ । धाम व्यवस्थापन समितिले हरेक वर्ष एउटै मिति अथवा फागुन २ गते देखि महायज्ञको आयोजना गर्दै आएको छ ।

धाम व्यवस्थापन समितिका अध्यक्ष बलदेव प्रसाद भट्टको अध्यक्षतामा भएको महायज्ञ अघि सहिद गेट देखि ट्राफिक चौराहा, रातोपुल हुँदै धामसम्म विभिन्न झाँकी सहितको कलश यात्राको आयोजना गरिएको थियो । महायज्ञमा श्रृगारिक महाआरती, हनुमान चालिसा हवनात्मक अनुष्ठान, अष्ठचिरन्जीवि प्राण प्रतिष्ठा महायज्ञ हुनेछन् । महायज्ञमा १०८ शिवलिंग स्थापना संकल्प पनि हुनेछ ।

महायज्ञमा ब्रम्हनिष्ठ सन्त शिरामणी लोकानन्द स्वामीको प्रवचन, प्रखर पुराणबाचक पुराणोपासक आचार्य सत्यराज अवस्थीबाट संगीतमय प्रवचन, वैदिक कार्यहरू विवाह, व्रतबन्ध, ८४ पूजा, गृह शान्ति, कालसर्प योग निवारण जस्ता अनुुष्ठानहरु पनि हुने बताइएको छ ।

महायज्ञमा हरेक साँझ वाराणसीको गंगाघाट र पशुपतिनाथको गंगाघाटमा हुने संगीतमय आरती, पञ्चकुण्डमा हवन अनुष्ठान, भगवान् शंकरको रुद्राभिषेक हुनेछ । शिवपुरी धाम, लोकानन्द स्वामीको परिकल्पनाबाट २०७० साल देखि दाताहरूको दानबाट मात्र निर्माण भएको हो । धाममा करोडौँका संरचना दानदातब्यबाट निर्माण भएका छन । १०८ फिटको शिवलिंग धामको मुख्य आकर्षण हो ।