धनगढी- कैलालीको धनगढी उपमहानगरपालिका–१४ सि गाउँमा रामजानकी मन्दिरको शिलान्यास गरिएको छ । सुदूरपश्चिमका भौतिक पूर्वाधार विकास मन्त्री प्रकाशबहादुर देउवाले मन्दिरको शिलान्यास गरिएको हो ।
मन्दिरको उद्घाटन गर्नुहुँदै मन्त्री देउवाले प्रदेश सरकार धार्मिक र साँकृतिक क्षेत्रको पहिचान, संरक्षण, संवर्द्धन गर्दै धार्मिक पर्यटनसँग जोडेर विकास गर्ने रणनीति लिएका बताए ।
उनले हिन्दुहरूका प्रमुख आराध्य देवका रूपमा मानिँदै आएका भगवान् राम र जानकीको नाममा निर्माण हुन लागेको रामजानकी मन्दिर निर्माणमा सरकारले सहयोग गर्ने बताएका छन् ।
सुदूरपश्चिम सरकारले गत वर्ष ३ दिने मानस खण्ड सम्मेलन आयोजना गरेको स्मरण गर्दै मन्त्री देउवाले प्रदेश सरकारले सुदूरपश्चिमलाई धार्मिक प्रर्यटनको सर्किटका रूपमा विकास गर्न सकिने उनको भनाई छ ।
यस्तै मन्त्री देउवाले सोही क्षेत्रमा रहेको सर्वोदय माध्यमिक विद्यालयको समेत अनुगमन गरेका थिए । सो विद्यालयको भौतिक विकासका लागी सहयोग गर्ने मन्त्री देउवाले प्रतिबद्धता व्यक्त गरेका छन् ।
गत वर्ष रामजानकी मन्दिर निर्माण गर्न स्थानीयहरूले महायज्ञ सञ्चालन गरी ८ लाख रकम संकलन गरेका थिए । विक्रम सम्बत २०५२ सालदेखि रामजानकी मन्दिरका नाममा जग्गा प्राप्त गरी सो क्षेत्रमा पूजाआजा गरिँदै आएको छ ।
शिलान्यास कार्यक्रमका मन्दिर व्यवस्थापन समितिका अध्यक्ष विष्णु अधिकारीको अध्यक्षतामा सम्पन्न भएको थियो । सो कार्यक्रममा वडा नम्बर १४ का वडाध्यक्ष मानबहादुर विष्ट विशिष्ट अतिथि रहेका थिए ।
