धनगढी- दुग्ध विकास संस्थानले दुधको मूल्य भुक्तानी नगरेको भन्दै कैलालीको अत्तरियामा दुध पोखर विरोध गरेका छन् । नेकपा एमाले निकट अखिल नेपाल किसान महासंघको अगुवाइमा दुध पोखेर बिरोध गरिएको हो । किसानले पाँच महिनादेखि संस्थानबाट दुध बिक्री गरेको रकम नपाउँदा समस्या ब्यहोर्नु परेको गुनासो गरे ।
भुक्तानी नपाउँदा बस्तुभाउका लागि चाहिने आवश्यक सामाग्री किन्नसमेत नपाएको गोदावरी नगरपालिकाका किसान मोहनलाल जोशीले बताए । ‘संस्थानमा पैसा रोकिएपछि आफूहरु समस्यामा परेको बताउँदै उनले भने, ‘घर खर्च समेत धान्न कठिनाई भएको बताए ।
दुधको भुक्तानी नपाउने, उचित मूल्य नपाउने र बिक्रीको समस्याले किसान विस्थापित हुनुपर्ने अवस्था भएको उनीहरुले गुनासो गरेका छन् ।
दुग्ध विकास संस्थान धनगढी दुग्ध वितरण आयोजना कार्यालय अत्तरियाले गत १६ असोजदेखि अहिलेसम्म किसानलाई दुधको रकम भुक्तानी दिन सकेको छैन् । कार्यालयका संकलन प्रमुख चन्द्रमोहन लेखकले दुधको करिब पाँच करोड १० लाख रुपैयाँ भुक्तानी दिन बाँकी रहेको बताए ।
संस्थानले अहिले प्रदेशभरिबाट दैनिक पाँच हजार लिटर दुध संकलन गरिरहेको छ । तर दैनिक पाँच सय लिटरमात्र बिक्री भइरहेको संकलन प्रमुख लेखकले जानकारी दिए । बाँकी दुध पाउडर बनाउनका लागि संस्थानको पोखरा कार्यालय पठाउनु परिरहेको उनले बताए । दुध बिक्री नभएर संस्थानको आम्दानी घटेपछि किसानलाई भुक्तानी दिन नसकिएको जनाइएको छ ।
