धनगढी- धनगढीमा पनि आज विश्व उपभोक्ता अधिकार दिवस मनाइएको छ । वाणिज्य, आपूर्ति तथा उपभोक्ता संरक्षण कार्यालय र उद्योग वाणिज्य तथा उपभोक्ता हित संरक्षण निर्देशनालय धनगढीको आयोजनामा अन्तरक्रिया कार्यक्रमको आयोजना गर्दै विश्व उपभोक्ता अधिकार दिवस २०८० मनाइएको हो ।

उद्योग वाणिज्य तथा उपभोक्ता हित संरक्षण निर्देशनालयका निर्देशक खेमप्रसाद चौधरीको अध्यक्षतामा भएको कार्यक्रमको प्रमुख अतिथि सुदूरपश्चिम प्रदेशका उद्योग, वन तथा वातावरण मन्त्रालयका प्रमुख सचिव जीवनाथ पौडेल रहेका थिए ।

कार्यक्रममा बोल्दै प्रमुख अतिथि सचिव पौडेलले उपभोक्ताले आफ्नो कानुनी नैतिकता लाई भुल्न नहुने बताए । उपभोक्तालाई जबसम्म आफ्नै दायित्व र अधिकार वोध हुँदैन तबसम्म पहुँच नपुर्ने उनले बताए । जुनसुकै कानुन बनाए पनि कानुन कार्यान्वयन नहुँदासम्म प्रभावकारी नहुने बताए । जति बजार अनुगमन हुनुपर्ने हो त्यति अनुगमन हुन नसकेको उनको भनाइ छ ।

यस्तै कार्यक्रममा बोल्दै कैलालीका सहायक प्रमुख जिल्ला अधिकारी यज्ञराज जोशीले उपभोक्ताले गुणस्तरीय बस्तु पाउनुपर्ने सबैको अधिकार रहेको बताए । बिक्रेतालाई धेरै मार नपरोस् भनेर मासिक अनुगमन गर्ने गरेको उनले बताए । बजार अनुगमनलाई अझै प्रभावकारी बनाएर अनुगमन गर्न आवश्यक रहेको उनको भनाइ छ ।

केही सामान किन्दा उपभोक्ताले पहिला अफै सचेत हुनुपर्ने उनले बताए । बजार अनुगमन चाडपर्वमा मात्रै नभई नियमित अनुगमन गर्न आवश्यक रहेको अन्तरक्रिया कार्यक्रममा सहभागी सरोकारवालाहरूले बताएका छन् । अनुगमनका नाममा अनुगमन नभई मर्यादित र सोचो अनुगमन गर्नुपर्ने उनीहरूको माग छ ।

यस्तै आयोजकहरूले पूर्व सध्यामा बिहीवार धनगढीमा माध्यमिक विद्यालय स्तरीय निबन्ध प्रतियोगिता समेत गरेको थियो । ‘‘उपभोक्ता अधिकार हामी सबैको सरोकार’’ शीर्षकको निबन्ध प्रतियोगितामा धनगढीको चैतन्य पाठशाला स्कुलमा अध्ययनरत छात्रा सूचना धामी प्रथम भएकी थिइन् भने द्वितीय धनगढीकै मिलन इङ्लिस स्कुलकी छात्रा कोपिला जोशी भइन् भने तृतीय सिटी स्कुलकी छात्रा गीता साउद भएकी थिइन् ।

प्रथम धामीलाई पाँच हजार नगद र प्रमाणपत्र, द्वितीय जोशीलाई तीन हजार नगदसहित प्रमाणपत्र र तृतीय साउदलाई दुई हजार र प्रमाण पत्र वितरण गरिएको थियो । प्रतियोगितामा धनगढीका आठ वटा विद्यालयको सहभागिता थियो ।

कार्यक्रममा उपभोक्ता हित संरक्षण मञ्च नेपाल सुदूरपश्चिम प्रदेश समितिका सचिव भोजराज जोशी र वाणिज्य, आपूर्ति तथा उपभोक्ता संरक्षण कार्यालय धनगढीका सुरेशप्रसाद जैशीले कार्यपत्र प्रस्तुतीकरण गरेका थिए ।