धनगढी- कैलालीको धनगढी उपमहानगरपालिकाले सामुदायिक विद्यालयमा ४ हजार छ सय फलफूलका बिरुवा रोप्ने भएको छ ।
उपमहानगरले ‘विद्यालय फलफूल संरक्षण प्रवर्द्धन कार्यक्रम’ अन्तर्गत यो वर्ष ५१ सामुदायिक विद्यालयमा बिरुवा रोप्न सुरू गरेको हो । मङ्लवारबाट बिरुवा रोप्न सुरु गरिएकोमा पहिलो दिन १६ सामुदायिक विद्यालयमा एक हजार ५ सय २५ बिरुवा रोपिएको नगर प्रमुख गोपाल हमालले जानकारी दिए ।

उपमहानगरले शिक्षा महाशाखाका प्राविधिक सहायक केशव खत्रीलाई सामुदायिक विद्यालयमा बिरुवा रोप्ने कार्यक्रमको जिम्मेवारी दिएको जनाइएको छ । धनगढीका ६८ सामुदायिक विद्यालयमध्ये पर्खाल भएका ५१ विद्यालयमा फलफूलका बिरुवा रोप्न लागिएको उपमहानगरले जनाएको छ ।

उपमहानगरले सामुदायिक विद्यालयमा आँप, अम्बा र लिचीका बिरुवा वितरण गरेको छ । विद्यालयमा बिरुवा रोपेर संरक्षण गर्न सजिलो हुने र फल्न थालेपछि बालबालिकाहरूलाई नै खान दिने उद्देश्यले फलफूलका बिरुवा रोप्ने योजना बनाइएको नगर प्रमुख हमालले बताए ।
‘पर्यावरणको संरक्षण गर्न र बालबालिकाहरूलाई खान दिने हिसाबले फलफूल रोप्न लागिएको हो’ उनले भने ‘पर्यावरणको संरक्षण र बालबालिकाले फल खान सकून रुखमा चढेर रमाउन सकून् भनेर फलफूलको बिरुवा रोप्न थालिएको हो ।’

विद्यार्थीहरूले विद्यालयमा पढ्दै मौसमअनुसार पाक्ने फलफूल टिपेर खान पाउन भनेर हरेक विद्यालयमा जग्गाको क्षेत्रफलका आधारमा आँप र अम्बाको बिरुवा वितरण गरिने कार्यक्रम संयोजक केशव खत्रीले बताए ।