काठमाडौं । देशका विभिन्न ठाउँमा भएका आगलागीबाट धनमाल जलेर नष्ट भएको छ । डोटीको शिखर नगरपालिका–६ कोटगाउँ बस्ने गणेशबहादुर बलायरको घरमा विद्युत सर्ट भई शनिबार दिउँसो आगलागी हुँदा लत्ताकपडा, खाद्यान्न, भाँडावर्तन, काठको फर्निचरहरू लगायतका धनमाल जलेर करिब १ लाख ५० हजार रूपैयाँ बराबरको धनमाल नष्ट भएको छ ।
झापाको मेचीनगर नगरपालिका–१० बस्ने ४५ वर्षीय रोहित पोखरेलको अस्मिता पाउरोटी उद्योगको पुरानो सामानहरू राख्ने गोदाममा विद्युत सर्ट भई शनिबार साँझ आगलागी हुँदा गोदाममा रहेको पुरानो बोराहरू, काठ, मिक्चर मेसिन र जेनेरेटर मेसिन समेत जलेर करिब १ लाख ५० हजार रूपैयाँ बराबरको धनमाल नष्ट भएको छ ।
मोरङको सुनवर्षी नगरपालिका–८ सिक्टी बस्ने मण्डलिया मियाको मिल घरमा विद्युत सर्ट भई शनिबार दिउसो आगलागी हुँदा मिल घर, मिल घर भित्र रहेको मकै, धान र गहुँ पूर्णरूपमा र मिलको मेसिनरी सामानहरू आंशिक रूपमा जलेर करिब १५ लाख रूपैयाँ बराबरको धनमाल नष्ट भएको छ ।
पर्वतको कुश्मा नगरपालिका(१४ आर्थर काउलेस्थित ठुलीपोखरी पन्चासे सडक खण्डमा पर्किङ गरी राखेको गण्डकी बिएए ०८२८ नम्बरको बोलेरो जिपमा शनिबार राति आगलागी हुँदा जिप पूर्णरूपमा जलेर क्षति भएको छ । प्रहरीले स्थानीय बासिन्दा तथा दमकलको सहयोगमा आगलागी नियन्त्रणमा लिनुका साथै यस सम्बन्धमा आवश्यक अनुसन्धान गरिरहेको जनाइएको छ ।
