धनगढी । कैलालीको धनगढी उपमहानगरपालिकाले संचालन गरेको विशेषज्ञ वडा स्वास्थ्य क्लिनिकबाट १ लाख ३३ हजार ८ सय ७५ जनाले सेवा लिएका छन् ।
आव २०७९/८० को साउनदेखि २०८१/८२ को जेठ मसान्तसम्मको अवधिमा उक्त संख्याका विरामीले सेवा लिएका हुन् । २०७९ को स्थानीय तहको निर्वाचनमा नगर प्रमुखमा गोपाल हमाल निर्वाचित भएपछि उक्त सेवा सुरु गरेका थिए ।
धनगढी उपमहानगरपालिकाको शनिबारको तेह्रो नगर सभाबाट पारित गरिएको आगामी आर्थिक वर्ष २०८२र८३ को नीति तथा कार्यक्रममा २०७९।८० साउन देखि शुरु भएको विशेषज्ञ वडा स्वास्थ्य क्लिनिकबाट चालु आर्थिक बर्षको जेठमसान्तसम्म ४१ हजार ६ सय २२ गरी हालसम्म कुल १ लाख ३३ हजार ८ सय ७५ सेवाग्राहीले सेवा लिएको उल्लेख छ । सो अन्तरगत सञ्चालित ग्रामीण अल्ट्रासाउण्ड कार्यक्रमबाट हाल सम्म ६ हजार ७ सय २० जना गर्भवती महिलाहरुको अल्ट्रासाउण्ड गरिएकोमा ८२ जनामा जटिलता पहिचान पश्चात रेफर गरिएको पनि उल्लेख छ ।
आमा बचाउ कार्यक्रम मार्फत १ हजार ३४ जनाले नि:शुल्क एम्बुलेन्स सेवा
त्यस्तै आमा बचाउ कार्यक्रम मार्फत चालु आर्थिक बर्षको जेठमसान्तसम्म ४ सय ५४ गरी हालसम्म १ हजार ३४ जनाले निशुल्क एम्बुलेन्स सेवा प्राप्त गरेका छन् । ४ हजार ५ सय ६८ जना सुत्केरी आमालाई सुत्केरी भएको २४ घण्टा ३ दिन र ७ दिनमा घरमै स्वास्थ्यकर्मी गएर जाँच गरिएको पनि सो निति तथा कार्यक्रममा उल्लेख गरिएको छ ।
