धनगढी । नेकपा (माओवादी केन्द्र)का सुदूरपश्चिम प्रदेश सह-इन्चार्ज एवं प्रदेश संसदीय दलका नेता खगराज भट्टले सरकार कृषिमा गम्भीर र जिम्मेवार बन्न आवश्यक भएको बताए ।
माओवादी केन्द्रका भातृ संगठन अखिल नेपाल किसान महासंघ (क्रान्तिकारी केन्द्र)ले आइतबार धनगढी उपमहानगरपालिका-१४ फूलबारी आयोजना गरेको २२ औं राष्ट्रिय धान दिवसमा बोल्दै उनले यस्तो बताएका हुन ।
सरकारले विगत लामो समयदेखि धान दिवस मनाउदै आएपनि धानको महत्व,कृषिको आधुनिकीकरण तथा किसानलाई प्रविधि,बीउबिजन,बजारीकरण सहुलियतमा राज्य चुक्दै आएको बताए ।
उनले भने ‘किसानले हरेक वर्ष खेतीपातीको सिजनमा मलको भोग्नु परेको छ । तराईमा प्लटिङ गरेर उर्भर भूमि कंक्रीटमा परिणत हुँदै छ ।पहाडका सुन्दर फाँटहरु खाली हुँदै छ्न । यो डरलाग्दो अवस्था हो । यसमा सरकार गम्भीर हुनुपर्छ ।’
लाखौं,करोडौं जनताको जीवनसंग जोडिएको कृषिलाई सरकारले बजेट,नीति तथा कार्यक्रम र कार्यान्वयनको प्राथमिकतामा राख्नुपर्ने उनले बताए ।
उनले भने ‘यसमा सरकारको गम्भीर ध्यानाकर्षण गराउन चाहान्छु ।’
उनले नेपाली जनताको सबभन्दा महत्वपूर्ण खाद्य पदार्थको रुपमा धानको असाधारण महत्त्व रहेको बताए ।
कार्यक्रममा नेकपा (माओवादी केन्द्र) केन्द्रीय सदस्य ओमप्रकाश पुन,नेकपा (माओवादी केन्द्र) केन्द्रीय सदस्य तथा पूर्वमन्त्री रमेशसिंह धामी,नेकपा (माओवादी केन्द्र) कैलाली जिल्ला संयोजक लाजुराम चौधरी,क्षेत्रीय संयोजक निर्मल शाह,धनगढी उपमहानगर कमिटी अध्यक्ष बलबहादुर ऎरलगायतको उपस्थिति रहेको थियो ।
दिवसको अवसरमा ५ कठ्ठा खेतमा धान समेत रोपिएको थियो । कार्यक्रम महासंघका कैलाली जिल्ला अध्यक्ष लोकेन्द्र जोशीको अध्यक्षतामा भएको थियो ।
धान दिवस कार्यक्रमका तस्बिरहरु
