धनगढी । सुदूरपश्चिम प्रदेश सभाको सामाजिक विकास समितिले कञ्चनपुरमा छाउपडी गोठमा सर्पले टोकेर महिलाको मृत्यु भएको घटनाबारे बुधबार स्थलगत अनुगमन सगैं सरोकारवालाहरु संग छलफल गरेको छ ।
असार २७ गते कञ्चनपुर जिल्लाको कृष्णपुर नगरपालिका वडा नम्बर १ निगालीमा छाउपडी गोठमा सुतको बेला सर्पले टोकेर ३२ बर्षिया कमला आउजीको ज्यान गरेको बिषयमा समितिले घटनास्थल अवलोकन तथा सरोकारवालाहरुसंग छलफल गरेको हो ।

कृष्णपुर नगरपालिकामा भएको छलफल कार्यक्रममा सामाजिक विकास समितिका सभापति धर्म राज पाठकले सर्पले टोकेर मान्छेको ज्यान जाने घटना अरु पनि भएका भएपनि कृष्णपुरमा घटना छाउगोठमा बसेका कारण भएकोले सबैले संवेदनशील भएर काम गर्नुपर्ने आवश्यकता रहेको बताए ।

सभापति पाठकले महिनाबारी भएको बेला महिलालाई चार दिन घरबाट छुट्टै गोठमा राख्ने गरेका कारण पटक पटक महिलाहरुको ज्यान जाने जस्ता घटनाहरु भइरहेकोले घरमा बसे मात्रै सुरक्षित भइन्छ भन्ने बुझ्न र बुझाउन चेतनामुलक कार्यक्रमहरु आवश्यक रहेको बताए ।

प्रदेश सभाले नीतिगत तहमा यसबारे केही काम गर्नुपर्छ भन्ने लागेमा आफहुरुलाई सुझाव दिन आग्रह गर्दै सभापति पाठकले आफहुरुले ती सुझावका आधारमा प्रदेश सरकारका मन्त्री र आवश्यक परे मुख्यमन्त्री समेतसंग छलफल गरी नीतिगत प्रबन्ध गर्न र चेतनामुलक कार्यक्रमका लागि बजेट राख्न पहल गर्ने समेत बताए ।
कञ्चनपुरका प्रमुख जिल्ला अधिकारी लक्ष्मण ढकालले सरकारले छाउपडी गोठ बनाउने र त्यसमा बस्न लगाउने कुरालाई कानूनी रुपमा दण्डनीय मानेको भएपनि ब्यवहारिक रुपमा कार्यान्वयन पक्ष कमजोर रहेकोले निगालीमा घटना भएको बताए ।

त्यस्तै कञ्चनपुरका प्रहरी प्रमुख एसपी खड्क बहादुर खत्रीले छाउपडी गोठ भत्काउन प्रहरी परिचालन गर्दा पनि स्थानीयको सहयोग भएन भने सम्भव नहुने बताए ।
कृष्णपुर नगरपालिकाका नगर प्रमुख हेमराज ओझाले नगरपालिका भरी दर्ता भएका १६ हजार घरधुरी रहेको र दर्ता हुन बाँकी समेत गरेर २० हजार घरधुरी रहेको अनुमान रहेको बताउँदै ती मध्ये २ सय देखि २ सय ५० घरमा मात्रै छाउपडी गोठहरु रहेको आफ्नो अनुमान रहेको बताए ।

नगर प्रमुख ओझाले चेतनाका कारण छाउगोठमा नबस्ने बनाउन समय लाग्ने भएकोले कानूनी रुपमै प्रवन्ध गरेर छाउपडी गोठमा बस्ने र बस्न पठाउनेलाई कार्वाही हुने ब्यवस्था गरेर बाध्यकारी बनाए मात्रै गोठमा बस्ने समस्या हट्ने बताए ।

नगरपालिकाले अहिले १५ दिनको समय दिएर आफै छाउगोठ भत्काउन भनेको र त्यस अवधिमा नभत्काए प्रहरी परिचालन गरेर भएपनि भत्काइने नगर प्रमुख ओझाले जानकारी दिए ।

छलफल कार्यक्रममा सहभागी स्थानीय बासिन्दा तथा बिभिन्न क्षेत्रका अगुवाहरुले चेतनामुलक कार्यक्रम संगै कानून बनाएर कार्वाहीको पाटोलाई पनि संगै लैजानुपर्ने सुझाव दिएका थिए ।

स्थलगत अनुगमनमा सामाजिक विकास समितिका सभापति पाठक संगै समितिका सदस्य शिबराज भट्ट, जानकी कुँवर संगै प्रदेश सभाको महिला समन्वय समितिका संयोजक सन्तोष शर्मा थापा, सदस्यहरु इन्दिरा गिरी, गिता देवी माल, मधु भारती, गीता चौधरी र लक्ष्मी बिक सहभागी थिए ।