धनगढी । किसान बहुउद्देश्यीय सहकारी संस्थाले आफ्नो ३०औं वार्षिकोत्सव विविध कार्यक्रम गरि मनाएको छ ।
कैलालीको लम्कीचुहा नगरपालिका–१ लम्की बजारमा केन्द्रीय कार्यालय रहेको किसान सहकारी संस्थाले सोमबार विविध रचनात्मक कार्यक्रमहरु गर्दै वार्षिकोत्सव मनाएको हो ।
सो अवसरमा संस्थाका महाप्रबन्धक डम्बरबहादुर शाहले सामाजिक सञ्जालमा भिडियो सन्देश जारी गर्दै ३० औं वर्ष सम्मको यात्रामा साथ, समर्थन र शुभेच्छा राख्नुहुने सम्पूर्ण प्रति कृतज्ञता व्यक्त गर्दै भविष्यमा पनि निरन्तर समर्थन र शुभेच्छाको अपेक्षा गरेका थिए ।
बार्षिकोत्सव समारोह कार्यक्रममा शुभकामना व्यक्त गर्दै संस्थाका अध्यक्ष सुरेन्द्रकुमार शाहले संस्था समुदाय केन्द्रीत उद्देश्यका साथ अगाडि बढिरहेकोले समुदायको निरन्तर साथ र विश्वासले नै संस्थाको प्रगतिमा प्रेरणा दिएको बताए ।
बार्षिकोत्सवका अवसरमा आयोजित विभिन्न अतिरिक्त कृयाकलापका विजेता कर्मचारी तथा गत आवको कार्यसम्पादनका आधारमा प्रशंसनीय कार्य गर्ने १५ जना कर्मचारीलाई सम्मानित समेत गरिएको संस्थाका विभागिय प्रमुख एवं सूचना तथा जनसम्पर्क अधिकृत दीपकराज ढुंगानाले जानकारी दिए ।
गत आवमा प्रशंसनीय कार्यप्रदर्शन गरे बापत शाखा प्रमुखहरु चन्द्रकान्त रेग्मी, चक्रप्रसाद भण्डारी, प्रविण चौधरी र दिलमाया थापा मगरलाई पुरस्कृत गरिएको उनले बताए । कर्मचारीहरु उषा राना मगर, भुपेन्द्र रावल, दिपेन्द्र बटाला, सुदिप थारु, धिर्जा कुमारी ढकाल, मेनका हमाल, नरपताकुमारी जैसी, रिमा चौधरी, प्रेम चौधरी, दिलिप कठरिया र मनिष राना समेत पुरस्कृत भएको उनले बताए ।
सोही अवसरमा सञ्चालित रक्तदान शिविरमा १ सय प्वाईन्ट रगत संकलन गरि टीकापुर रेडक्रसलाई प्रदान गरिएको जनाइएको छ ।
२०५२ साल कार्तिक १७ गते २५ जना शेयर सदस्यहरुबाट ६० हजार तीन सय शेयर पुँजी संकलन गरी स्थापना भएको किसानका हाल संस्थामा ९१ हजार ७ सय २३ सदस्य रहेका तथा संस्थाको कुल सम्पत्ति ६ अर्ब ९२ करोड पुगेको संस्थाले जनाएको छ ।
सुदूरपश्चिम प्रदेश र लुम्बीनी प्रदेशको राजापुर नगरपालिका कार्यक्षेत्र रहेको सहकारी संस्थाले हाल मुख्य तीन वटा व्यवसायिक क्रियाकलाप मार्फत सेवा दिदै आएको छ । आधुनिक वित्तिय सुविधा सहितको बचत तथा ऋण सेवा,कृषि उत्पादनमा टेवा पु¥याउने किसान–कोप एग्रो बिजनेश र उपभोक्ता सचेतना सहित गुणस्तरीय उपभोग्य वस्तुको बिक्री वितरण गर्ने किसान–कोप मार्ट मार्फत सेवा दिदै आएका संस्थाका महाप्रबन्धक डम्बरबहादुर शाहले बताए ।
बचत तथा ऋण सेवा तर्फ ४१ वटा शाखा कार्यालय र एग्रो तथा मार्ट तर्फ ९ आउटलेट गरी ५० सेवाकेन्द्रहरु मार्फत संस्थाले आफ्ना वित्तीय तथा गैरवित्तीय सेवा प्रवाह गर्दै आइरहेको उनले बताए ।
विगतका वर्षहरुदेखि संस्थाले आफ्ना सदस्यलाई बार्षिक लाभांश, संरक्षणपुँजी फिर्ता कोषबाट रकम वितरण र अन्य सुविधाहरु समेत प्रदान गर्दै आएको जनाइएको छ । हालसम्म संस्थाले आफ्ना सदस्यलाई २९ करोड रुपैयाँ गैरवित्तीय सुविधा मार्फत वितरण गरिसकेको संस्थाले जनाएको छ । जसमा सुत्केरी स्याहार,काजकृया खर्च भुक्तानी र प्राकृतिक प्रकोप,गम्भीर रोगको उपचार गर्नका लागि सदस्यहरुले सुविधा प्राप्त गरेको जनाइएको छ ।
वार्षिकोत्सव कार्यालयमा संस्थाका पूर्वसञ्चालक, पूर्वलेखा सुपरिवेक्षण समितिका पदाधिकारी, पूर्व तथा वर्तमान सल्लाहकार समिति सदस्यको समेत उपस्थिती रहेको थियो ।
