धनगढी । सुदूरपश्चिम प्रदेशको भूमि व्यवस्था,कृषि तथा सहकारी मन्त्रालयले नयाँ र किसानलाई उत्प्रेरणादायी कामको सुरुवात गरेको छ ।
मन्त्रालयले विभिन्न क्षेत्रका उत्कृष्ट किसानलाई घरदैलोमा पुगेर सम्मान दिन थालेको छ ।

किसानबाट सम्मान लिने होइन् किसानलाई सम्मान दिनुपर्छ भन्ने मान्यताका साथ मन्त्रालयले किसान सम्मान कार्यक्रमको सुरुवात गरेको छ ।
शनिबारबाट सुरु गरेको यो कार्यक्रममा मन्त्रालयका प्रदेश सचिव शंकर साह नेतृत्वको टोलीले शनिबार र आइतबार कैलाली र कञ्चनपुरका ७ जना उत्कृष्ट किसानका घरमै पुगेर खादा लगाउँदै सम्मान गरेको छ ।

प्रदेश सचिव साह,भेटेरिनरी अस्पताल तथा पशुसेवा विज्ञ केन्द्र कैलालीका प्रमुख चन्द्रकान्त पन्त र कृषि ज्ञान केन्द्र कैलालीका वरिष्ठ कृषि विकास अधिकृत टेकबहादुर बिष्टको टोलीले आइतबार कैलालीको गौरीगंगा नगरपालिका–९ शंकरपुरका मौरीपालक किसान मोहनराज खनाल,लम्कीचुहा नगरपालिका–९ प्रतापपुरका स्याउखेती गर्ने किसान गोकर्ण ओलीलाई सम्मान गरेको छ ।

त्यस्तै,जानकी गाउँपालिका–५ पहाडीपुरका किसान नारायणप्रसाद जोशी र कञ्चनपुरको भीमदत्त नगरपालिका–१ राजीपुरस्थित स्वावलम्बी अपाङ्गता कृषक समूहका अध्यक्ष सुन्नरादेवी साउदलाई सम्मान गरेको छ ।

शनिबार कैलालीको टीकापुर नगरपालिका–१ का भैँसीपालन गर्ने किसान दुर्गा जैसी,सोही ठाउँको नैनी एग्रो फर्म एण्ड रिसर्च सेन्टरका सञ्चालक करुणाकर भट्ट र सोही ठाउँका तरकारीखेती गर्ने किसान जयराम चौधरीलाई सम्मान गरिएको जनाइएको छ ।

किसानलाई हौसला दिन र कृषिप्रति आकर्षण बढाउने उदेश्यले उत्कृष्ट किसान सम्मान कार्यक्रम गरिएको मन्त्रालयका प्रदेश सचिव साहले बताए ।

उनले भने ‘कृषि क्षेत्रमा योगदान पु¥याएका किसानलाई सम्मान गर्ने गरेका छौँ । जो किसान प्रेरणाका स्रोत हुनुहुन्छ । जसले अरुलाई पनि कृषि क्षेत्रमा लाग्ने उत्प्रेरणा जगाउनुभएको त्यस्ता किसानलाई सम्मान गर्छौँ ।’

उनले भने ‘किसानलाई खादा लगाउने काम मात्रै गर्दैनौँ । त्यहाँ उहाँहरुका समस्या के छन् बुझने,अनुगमन गर्ने सररल्लाह दिने काम गर्छौँ । समस्या समाधमान गर्ने कुरामा पनि जोड दिन्छौँ ।’

‘हामीले सार्वजनि विदाको दिन किसान कहाँ गएर सम्मान दिने गरेका छौँ । जसले मन्त्रालयको काममा पनि बाधा पुग्दैन्’ उनले भने ‘अहिले कैलाली र कञ्चनपुरमा सुरु गरेका छौँ । विस्तारै ९ वटै जिल्लामा पु¥याउँछौँ ।’

मन्त्रालयको सम्मानले आफूहरुको आत्मबल बढाएको किसान बताउँछन् । गौरीगंगा नगरपालिका–९ शंकरपुरका मौरीपालक किसान मोहनराज खनालले सम्मानले किसान र सरकारको दुरी नजिक बनाएको बताए ।

त्यस्तै, जानकी गाउँपालिका–५ पहाडीपुरका किसान नारायणप्रसाद जोशीले सम्मानबाट खुशी भएको बताउँदै अझ बलियो भएर कृषि कर्ममा लाग्ने बताए । लम्कीचुहा नगरपालिका–९ प्रतापपुरका स्याउखेती गर्ने किसान गोकर्ण ओलीले किसानको बारीमै आएर सम्मान गर्ने काम पहिलो पटक भएकाले धेरै खशी लागेको बताउँदै यसले किसानलाई थप ऊर्जा दिने बताए ।

कञ्चनपुरको भीमदत्त नगरपालिका–१ राजीपुरस्थित स्वावलम्बी अपाङ्गता कृषक समूहका अध्यक्ष सुन्नरादेवी साउदले मन्त्रालयले आफ्नो फर्ममै आएर सम्मान गर्दा आफूलाई धेरै खुशी लागेको बताइन् ।