धनगढी । कैलालीको जानकी गाउँपालिका– ५ पहाडीपुरका नारायणप्रसाद जोशीले व्यावसायिक तरकारीखेतीबाट लोभलाग्दो आम्दानी लिन थालेका छन् ।

५ वर्ष अगाडि खप्तड पशुपंछी तथा कृषि फर्म दर्ता गरेर व्यावसायिक तरकारीखेती गर्दै आएका जोशीले पछिल्लो समय राम्रो आम्दानी लिन थालेका हुन् ।

उनले तीन बिघा जग्गामा तरकारीखेती गरेको बताउँदै तरकारीबिक्रीबाट वार्षिक १० लाख आम्दानी हुने गरेको बताए ।

उनले भने ‘तरकारीखेतीबाट आम्दानी राम्रै हुन्छ । ज्याला मजदुरीलयायत सबै खर्च कटाएर वर्षमा १० लाख आरामसँग आम्दानी हुन्छ ।’

उनले भने ‘हामीले प्रायः टमाटर र लहरेबाली लगाउने लगाउने गरेका छौँ । अहिले टमाटर मात्रै दुई विघामा लगाएका छौँ । हामीले बढीजसो टमाटर उत्पादन गर्छौ ।’

बजार मूल्य सधै एकनासको नहुने बताउँदै उनले अहिले टमाटर प्रतिकिलो रु ८० मा विक्री गर्ने गरेको बताए । उनले भने ‘कहिले सस्तोमा बिक्री गर्नुपर्छ । कहिले राम्रै मूल्य पाइन्छ । तर घाटा हुँदैन् ।’

उनले भने ‘सात जनाको परिवार छ । घरखर्च राम्रै चलेको छ । बचत पनि हुन्छ । भाइ र बुवा पनि यसै तरकारीखेतीमै लाग्नुभएको छ । घरका तीन जना यसैबाट स्वरोजगार पनि भएका छौँ ।’

बजारको समस्या नहुने बताउँदै कैलालीका विभिन्न बजारहरु,कर्णाली प्रदेशको सुर्खेतसम्म आफ्नो उत्पादन पुग्ने गरेको जोशीको बताए । तरकारीखेतीबाटै भएको आम्दानीबाट रु २१ लाखमा ढुवानीका लागि बोलेरो जीप समेत खरिद गरेको उनले बताए ।

उनले आफ्नो फर्ममा रु ६ सयदेखि ८ सयसम्म ज्याला दिएर दैनिक ३/४ जनालाई रोजगारीसमेत दिएको बताए ।

तरकारीखेतीमा मेहनत बढी लाग्ने भएपनि आम्दानी राम्रो हुने उनको भनाइ छ । आगामी दिनमा विस्तार गरेर चार बिघा जग्गामा तरकारीखेती गर्ने योजना रहेको जोशीले बताए ।