धनगढी । श्रम,रोजगार तथा सामाजिक सुरक्षामन्त्री राजेन्द्रसिंह भण्डारीले युवालाई रोजगारीसँग जोड्न आवश्यक भएको बताएका छन् ।
आज कैलालीको धनगढी उपमहानगरपालिकाद्वारा आयोजित ‘प्रदेशस्तरीय सीप तथा रोजगार मेला–२०८२’को उद्घाटन कार्यक्रममा बोल्दै उनले यस्तो बताएका हुन् ।
उनले केही गर्छु भन्ने युवाको शक्तिलाई प्रयोग गर्ने वातावरण देशमा नहुँदा विदेशिन बाध्य भएको बताउँदै युवालाई रोजगारीसँग जोड्नु पर्ने बताए ।
उनले भने ‘केही गर्छु भन्ने युवालाई काम गर्न दिने वातावरण भएन । त्यसै कारण युवाको शक्ति विष्फोट भएको हो । जेनजी आन्दोलन होइन् । युवाको ऊर्जाको विष्फोट थियो ।’
उनले श्रमलाई हेर्ने दृष्टिकोण नै फरक भएका बताउँदै श्रमको आन्तरिक रोजगारका लागि कार्यविधि बनाएर त्यसलाई रोजगारसँग जोड्न संघीय मन्त्रालयले केही कुराहरु अगाडि बढाएका बताए ।
उनले सुदूरपश्चिमको केन्द्रसँग भौगोलिक दुरीमात्रै नभएर मनोवैज्ञानिक रुपमा पनि दुरीमा परेका बताउँदै यसको दुरी घटाउनु पर्ने बताए ।
कार्यक्रममा बोल्दै धनगढी उपमहानगरपालिकाका नगरप्रमुख गोपाल हमालले तालिम दिएर युवालाई स्वरोजगार बनाउनु पर्ने बताए । उनले
सुदूरपश्चिम युवायुवतीलाई सीप विकासमार्फत रोजगार र उद्यमशीलतासँग जोड्ने मेलाको उदेश्य रहेको बताए । उनले सीप तथा रोजगार मेलालाई प्रदेशस्तीय बनाउन प्रदेशका सबै स्थानीय तहलाई जोडिन आह्वान गरे ।
मेलामा सात क्षेत्रका २२ विधामा तालिम सञ्चालन हुने तथा मेला ४० दिनसम्म सञ्चालन हुने धनगढी उपमहानगरपालिकाले जनाएको छ । तालिममा ६ सय जना सहभागी हुने जनाइएको छ ।
