धनगढी । राष्ट्रिय स्वतन्त्र पार्टी (रास्वपा)बाट कैलाली–५ का उम्मेदवार आनन्दबहादुर चन्दले धनगढी चौराहास्थित पृथ्वीनारायण शाहको सालिकमा माल्यार्पण गरेर घरदैलो सुरु गरेका छन् ।
आज उनले रास्वपाका उम्मेदवार चन्दले पार्टीका नेता कार्यकर्ताको सहभागितामा पृथ्वीनारायण शाहको सालिकमा माल्यार्पण गर्दै घरदैलो सुरु गरेका हुन् ।
घरदैलो अभियानको सुभारम्भ गर्दै उनले भने ‘हाम्रो उदेश्य देशमा विकास गर्ने,राष्ट्रिय एकता कायम गर्ने,भ्रष्टाचार नियन्त्रण गर्ने र विधिको शासन बसाल्ने नै हो ।’
उनले आसन्न निर्वाचनमा कैलाली–५ का जनताको साथ पाउने विश्वास व्यक्त गरे । उनले भने ‘सबै क्षेत्रमा हामीलाई मतदाताले स्वागत गरिरहेका छन् । यो पाली परिवर्तनको पक्षमा जनता रहेको हामीले पाएका छौँ ।’
उनले पार्टी पनि एकढिक्का भएर अगाडि बढिरहेको बताए । उनले सेती प्रादेशिक अस्पताललाई केन्द्रीय अस्पताल बनाउने,फाफ्ला क्रिकेट स्टेडियम सम्पन्न गर्ने तथा गेटा अस्पतालमा आगामी वर्षदेखि चिकित्साशास्त्रका कार्यक्रम चलाउने उदेश्य लिएको बताए ।
उनले कैलाली मात्रै नभएर सिंगो सुदूरपश्चिमको विकासमा आफ्नो योगदान रहने बताए । आगामी फागुन २१ गते हुने प्रतिनिधिसभा सदस्य निर्वाचनका लागि कैलाली–५ मा उम्मेदवार रहेको चन्दले चुनावी गतिविधिलाई तीब्र बनाउँदै लगेका छन् ।
