धनगढी । जनता आवास कार्यक्रमअन्तर्गत कैलाली र कञ्चनपुरमा चालु आर्थिक वर्ष २०८२/८३ मा ४४ वटा घर निर्माण भइरहेका छन् ।
सङ्घीय सरकार र सुदूरपश्चिम प्रदेश सरकारको बजेटमा सहरी विकास तथा भवन कार्यालय, कैलालीमार्फत विपन्न परिवारका लागि उक्त घर निर्माण भइरहेका हुन् ।
कैलालीको धनगढी उपमहानगरपालिका,भजनी,घोडाघोडी,लम्की,गोदावरी,गौरीगंगा,टीकापुर नगरपालिका,बर्दगोरिया र जानकी गाउँपालिकाका विभिन्न वडामा ३० वटा र कञ्चनपुरको बेलौरी तथा पुनर्वास नगरपालिकाका विभिन्न वडामा १४ वटा दुईकोठे घर निर्माण भइरहेको सहरी विकास तथा भवन कार्यालय, कैलालीका सूचना अधिकारी रोहित अधिकारीले जानकारी दिए ।
उनले भने ‘केही घरहरु निर्माणको अन्तिम चरणमा पुगेका छन् । काम तीब्र गतिमा भइरहेको छ । सबै घरहरु चालु आवमै सम्पन्न गर्ने कार्यालयको लक्ष्य छ ।’
चालु आवमा जनता आवस कार्यक्रमका लागि सङ्घीय सरकारले रु. एक करोड ९० लाख र सुदूरपश्चिम प्रदेश सरकारले रु. २५ लाख विनियोजन गरेको उनले जानकारी दिए ।
कैलालीमा प्रतिघर निर्माण लागत अनुमान रु. चार लाख ४६ हजार चार सय ६३ र कञ्चनपुरमा प्रतिघर निर्माण लागत अनुमान रु. चार लाख ५३ हजार छ सय ४ रहेकामा कार्यलयले प्रतिघर निर्माणका लागि तीन लाख ८८ हजार उपलब्ध गराउने तथा बाँकी रकम बराबरको लाभग्राहीले श्रमदान गर्नुपर्ने उनले जानकारी दिए ।
कार्यालयले गत आव २०८१/८२ मा प्रदेश सरकारको बजेटमा जनता आवास कार्यक्रमअन्तरगत कैलालीमा १० र कञ्चनपुरमा १० गरि २० वटा दुईकोठे घर निर्माण गरेको उनले जानकारी दिए ।
गत आवमा सुदूरपश्चिम प्रदेश सरकारले २० घर निर्माणका लागि रु. ७० लाख बजेट विनियोजन गरेको उनको भनाइ छ । गत आवमा सङ्घीय सरकारबाट जनता आवसका लागि बजेट विनियोजन नभएको उनले जानकारी दिए ।
