धनगढी । लम्कीचुहा नगरपालिकाका नगरप्रमुख सुशीला शाही र लम्कीचुहा प्रादेशिक अस्पतालका निमित्त मेडिकल सुपरिटेन्डेन्ट डा.कमलेशप्रसाद यादवबीच देखिएको विवाद आपसी सहमतिमा समाधान भएको छ ।
शनिबार सुदूरपश्चिम प्रदेशको सामाजिक विकास मन्त्रालयमा भएको दुबै पक्षको बैठकमा आपसी सुमधुर सम्बन्ध स्थापित गर्न कार्यस्थललाई सुरक्षित वातावरण प्रदान गर्न दबै पक्षबीच सहमति भएको हो ।
अस्पतालको व्यवस्थापन र कार्यसम्पादनलाई लिएर नगरप्रमुख र निमित्त मेसुबीच विवाद चर्किएको थियो । विवाद सामाजिक सञ्जाल र सञ्चारमाध्यममा व्यापक रूपमा चर्चामा आएको थियो ।
विवादले चर्चा पाएपछि सामाजिक विकास मन्त्रालयले समेत प्रेस विज्ञप्ति जारी गर्दै गम्भीर ध्यानाकर्षण भएको जनाएको थियो ।
विज्ञप्तिमार्फत मन्त्रालयले स्वास्थ्यकर्मीको पेशागत मर्यादा, सुरक्षित कार्य वातावरण र स्वास्थ्य सेवामा कुनै पनि प्रकारको गैरकानुनी हस्तक्षेप स्वीकार्य नहुने स्पष्ट पारेको थियो ।
बैठक सुदूरपश्चिम प्रदेशका सामाजिक विकास मन्त्री बेलबहादुर रानामगर र प्रदेशसभा सदस्य दिवानसिंह विष्टको उपस्थितिमा सम्पन्न भएको थियो ।
